Sunday, April 14, 2024
24.8 C
Port-Vila
Sunday, April 14, 2024
More

    Kol blong kavremap gud ol wota kontena

    I kat kol blong pipol long Ambrym i kavremap gud ol wota blong drink mo kuk folem aktiviti blong tufala volcano we i ko antap long level 2 long wik ia.

    Geo-Hazards Dipatmen i talem toktok ia long VBTC Nius long tete se aktiviti blong Benbow i stap sakem aot ol lava glow mo Marum i stap sakem aot steam long maot blong volcano i mekem se oli inkrisim level blong volcano long Tuesday wik ia.

    Dipatmen ia we i lukluk plante long ol volcano aktiviti long kaontri i taem se ol kakae long karen i save distro long ashfol mo hemi impoten blong putum ol animol long shelta.

    Geo-Hazards dipatmen i talem se oli kasem ripot long ol pipol blong Ambrym se oli sikras long ren we i bin foldaon long wik ia.

    Geo-Hazards i talem se hemia i folem bigfala amaon blong Sulphur Dioxide(Gas we i kamaot long volcano) we i mekem acid ren. Dipatmen i askem pipol blong tekem kea mo lisen long ol advaes we oli stap putum aot.

    Vanuatu Meteo mo Geo-Hazards Dipatmen i kontinu blong monitarem aktiviti blong Benbow mo Marum volcano long Ambrym mo bae hemi apdeit.

    Ol volcano blong Vanuatu we oli stap long level 2 aktiviti hemi Benbow mo Marum long Ambrym, Gaua long Banks grup, Manaro long Ambae mo Yasur long Tanna.

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen