Woning blong kipim gud ol wota folem aktiviti blong Ambae Volcano we hemi sakem asis bagegen long wik ia mo i save kat acid ren.
Ofisa Incharge long Geo-Hazards Dipatmen, Ricardo William i talem long VBTC Nius.
Long 9o’klok long Wednesday naet, camera long Saratamata long Ambae, hemi tekem glow blong faea blong volcano wei i ko saen long ol klaod.
Ripot lo Saratamata i konfem se i nokat loud explosen be ikat dark plume blong asis hem i ko long wes/saot wes pat blong aelan. Pipol long ol aelans klosap tu oli save luk glow blong faea blong volcano. Volcano hemi sakem solfa daeoksaed tu we i save mekem konkon ren.
Advaes i ko long ol pipol long Ambae espeseli wes mo saot wes pat blong aelan blong folem ol ki mesej blong denja blong volcano.
Long Wednesday Geo-Hazard Dipatmen hemi givim aot infomesen beis long wan camera monitor we i stap long aelan blong Pentecost.
VBTC Nius i kasem infomesen se bitwin 2017 mo 2018 kavman hemi odarem wan mass evacuation blong olgeta pipol blong Ambae.
Mein rison from hemi no save gud wanem bae i hapen.
Level blong erapsen long taem ia hemi kasem level 4 we hemi hae wan we Geo-Hazard i save putum.
Bigfala impak long taem ia hemi ashfol we i afektem ful aelan wetem bigfala wan long Saot West mo Not.
Nomata se erapsen hemi kosem bigfala damej mbe pipol blong Ambae i muv bak hariap blong ribild bakegen.
Geo-Hazard depatment i talem se hemi stap monitarem everi Volkenu long kaontri we oli stap long level 2 semak olsem Ambae.
Long yia ia nomo i gat wan erapsen blong wan andawota volkano kolosap aelan blong Epi we hemi kam wan moa active volcano naoia.
I kat sam Air Vanuatu domestik flaet i kansel long Not folem aktiviti blong volcano.
Volcano blong Ambae i stap long alert level 2.
