Suprim Kot hemi registarem finis wan konstitusinol petisen we foma Praem Minista mo Presiden blong Pipol Progresif Pati Hon. Sato Kilman hemi faelem blong jalensem legaliti blong koling blong namba 5 extra-odineri siting blong Palemen.
Long konstitusinol petition we Hon. Kilman hemi putum, hemi askem Kot blong deklerem se rekwest we iko long spika long 25 Septemba 2023, blong kolem Palemen long namba 5 Extra-ordineri siting, ino folem law.
Mo askem long Kot tu blong hemi deklerem se rekwest blong Spika long 25 Septemba blong lukluk long motion blong tekem aot hem olsem Praem Minista ino folem Loa.
Mo blong Kot i deklerem se eni motion we ibin kam insaed long haus long siting ia ino gat effect long hem.
Hemi askem tu blong Kot i putum wan Stay Orda long motion blong nogat trast palemen hemi pasem blong tekem hem long namba 6 Oktober 2023, wetem eleksen blong niufala Praem Minista.
Insaed long Palemen Tusde moning, Hon. Kilman i talem se Spika hemi no sud gohed wetem siting ia from igat wan keis iko long Kot olsem wan constitutional petition.
Hemi wan samting we i mekem se majoriti blong olgeta memba blong Palemen i wokaot long jamba tedei moning.
“Mifala igat questen se weta wanem Spika italem hemi stret o nogat. And olsem mi talem festaem bae kot nomo hemi talem long yumi so mifala i wokaot and mifala wait blong kot hemi desaed,” hemi talem.
“Sapos Bruno hemi winin kes blong hem bae koling hemi no constitutional and sapos olsem wanem we Spika hemi mekem I null and void.”
Foma Lida blong Gavman ia we hemi bin serve long 33 dei olsem Praem Minista, i talem se koling ia hemi no folem loa.
Hemi se naoia igat wan kes istap long kot.
Mbe Spika blong Palemen Simeon Seule i stanap long wan orda we i kamaot long Apil Kot long namba 6 Oktoba we i talem se Palemen hemi save gohed wetem memba blong palemen blong Ambrym, Hon. Bruno Leingkone.
“Yes olsem Hon. foma praem minister yu gat raet blong resemap konsen blong yu from motion hemi tekem aot yu mo putum wan narawan. But as far as Palemen hemi konsen, igat wan oda we i mekem se yumi save kosem wetem business we istap.”
Praem Minista Hon. Charlot Salwai Tabimasmas hemi talem long VBTC News se Palemen hemi proceed blong tokbaot business blong gavman beis long orda we i kamaot long Apil Kot namba 6 Oktoba.
Hemi se evri memba blong Oposisen i ridim orda ia we hemi klia. Hemi se sapos oli no bin agree long orda, Oposisen hemi sud jalensem insted blong hemi atendem sesen blong Palemen.
Praem Minista Salwai i talem se tedei oposisen hemi enter long Palemen we i soem se oli awea long orda we Apil Kot hemi givim.
Hemi se oli save jalensem orda long Kot ia begegen sapos oli wantem mbe hemi se ino stret blong kam aotside long Palemen mo toktok long media.
