Seventy percen blong seves i stat blong rol bakegen afta long cyber attack long ol kavman website long en blong October.

Sistem blong kavman i bin paralaes folem ol rabis aktiviti blong ol intanansel haka i distebem ol opereson system.

Prime Minista, Ishmael Kalsakau i anaonsem hop long kavman sistem.

“Mi anaonsem se wael 70% blong ol kavman seves oli rikava vinis; Naoia yumi kat akses long kavman system we hemi inkludum kavman financial services, oli stat pem ol pipol vinis; oli aksesem tru long financial seves blong kavman,” Prime Minista Kalsakau i talemaot.

Customs mo Inland revenue oli kambak online. Passport Ofis stat long las wiken oli stat prosesem ol vinis. Vanuatu Polis Force hemi kambak online. Ol emergency laen we hemi ambulance, polis, Fire seves wetem kavman void oli kambak. Civil registry i kambak. Kavman email yumi save stat blong yusum bakegen wetem internet koneksen seves.”

Prime Minista Kalsakau i talem se naoia oli bildim wan sistem we bae i moa sekiua mo i sef agensem ol tret long fiuja.

“Ol expert blong yumi, ol patna blong olgeta oli traem had blong bambae oli faenem wanem nao i mekem se system blong yumi i foldaon,” Prime Minista Kalsakau i talemaot.

“Weta hemi kat criminal aktviti long netwok blong yumi mbe wanem oli faenem hemi kat tu posibol point. Wan hemi ol unsecure kavman website we ol third pati oli manejem. Seken hemi ol wok station we oli stap insaed long netwok blong kavman we oli weak long security. Mo bae yumi wok had blong mas faenem aot. Analysis blong data we i stap wetem yumi  hemi soem se yumi kat bigfala traffic i kam long Europe, Asia mo United States blong America mbe ol indikesen ia hemi save mislid. Ol haka i oltaem traem blong yusum ol private netwok mo ol difren seves blong oli haedem ol location(Ples we oli stap long hem) blong olgeta. So yumi no rili sua yet naoia se oli sponsa o oli organise long wan cyber criminal aktiviti olgeta wan.”