Pipol i save faen sapos oli brekem ol COVID rul we Ministry blong Health i putum.
Minista blong Health, Bruno Leingkone i anaonsem folem inkris namba blong ol COVID kes.
Minista Leingkone i talem se bae ol memba blong fos bae oli mekem moa awenes long ol ditel blong ol faen ia.
“Mi wantem konfem se ol niu rul oli bin disaed vinis afta long plante toktok wetem ol minista, ol hed blong ministry blong Health mo komiti,” Minista Leingkone i talem.
“Mo mi wantem infomem yumi evri wan se hemia nao plan we bambae yumi tekem long nekis dei long wik ia i ko. Long wik ia bambae kavman i letemap ol mesa blong hem. Ol polis bae oli kontrolem muvmen blong pipol blong karemaot ol oda blong health.
“Ministry blong Health hemi stap wok wetem State Law Ofis blong putum olgeta hevi penalti taem yumi brekem ol simpol rul ia tru long spot faen. Ol ditel blong faen bambae i kamaot long ol dei ia taem polis i mekem awenes.
Ol rul blong COVID ia hemi werem mask, washem hand wetem sop mo wota mo aplaem fasin blong stanap longwe long nara man.
Chief Executive Ofisa blong Public Land Transport Authority, Reginald Tabi i talem se ol seves bus i mas kat faev pasenja nomo from fulap oli no folem hemia olsem pat blong social distens o stap longwe long nara man.
Mr Tabi i talem se i mas kat hand sanitaeza long transpot blong ol pasenja.
“Mekem sua se yu rispektem curfew haoa we i stat long 6pm-6am evridei. Hemia i minim se yu stat ron i ko bak long haos blong yu samples long 5pm olsem. Yu no traem stap ron i ko bak long haos long 6pm from yu leit finis ia,” Mr Tabi i talem.
“Oli infomem yumi se stat long tumoro tomorrow mekem sua se pasenja blong yu i kat COVID vaccination card from bae oli jekem. Taem pasenja i stopem yu mekem sua se hemi kat.
“Stat tumoro, bae oli moa strik mo yu save faen. Oli notem tu se i kat ol bus oli stap ron yet afta 6pm from kava o drink. Monday i ko sapos oli kasem yu bae yu save faen from yu brekem curfew haoa mo bae oli holem trak blong yu. Yumi stap ko tru long had taem finis mo yu no mekem laef i had moa long yu wan. Rispektem curfew haoa mo oda we i kamaot finis mo pasem mesej i ko long nara draeva.”
Minista Leingkone i talem se ol faen ia i aplae tu long ol sto mo bisnis haos we oli fail blong blong komplae wetem ol duti blong olgeta.
Hemi talem se hemia blong helpem kavman long kea blong ol kastoma.
“Hemia i inkludum tu ol bisnis haos we oli feil blong folem ol rul blong helpem kavman blong kea long pipol,” Minista Leingkone i talem.
“Exempol blong putum pesin blong washem hand, sop mo towel blong wipem han, pratisim social distens mo provaedem security blong gaedem pipol long hao oli save rispektem ol COVID rul.”
