Saturday, May 18, 2024
25.8 C
Port-Vila
Saturday, May 18, 2024
More

    Kavman i apointem COI long tufala Vietnamese ship

    Kavman i apointem wan niufala komisen blong inkwaeri tedei from 2 Vietnamese ship we i bin kasem Port Vila long Septemba wetem sam kago we i putum kwestin long pablik mo kavman.

    Minista blong Jastis, Hon. James Bule, i statem niufala inkwaeri ia taem we hem i apointem ol memba blong komisen long moning ia.

    “Taem we me putum pen long pepa me saenem, bae wok i stap kohed ia nao, stat tede iko,” Hon. Jame Bule i talem.

    Hon. Bule i talem se niufala investigesen bae i lukluk iko insaed long tufala Vietnamese ship we i bin kamtru long namba 2 Septemba yia ia.

    “Intensen blo apointem ol komisen blong inkwaeri (COI), hemi blong traem establisim sam trut mo ol daot we i stap naoia we fulap kwesten i bin res long wae nao tufala ship ia i bin kam mo tufala ship we i kam yumi biliv se i kat sam guds we i stap insaed tu mo pipol oli no rili save wea ol guds ia i kam long hem mo bae ol guds ia iko long hu stret, mo sipos ol guds ia i kam insaed folem stret rod o nokat.”

    Long tem blong refrens long niufala komisen blong inkwaeri ia i kat ol alegesen se tufala vesel ia i karem in sam kago we i no stret mo bifo Customs i kondaktem ol rutin chek mo inspeksen, i kat alegesen se sam man i bin karemaot sam long ol kago ia bifo inspeksen i save kohed.

    I kat sam alegesen tu se rejistresen blong tufala vessel ia mo spesel visa iko long ol kru blong oli save harvestem ol si kukamba long Vanuatu we i no stret folem loa.

    I kat strong inkwaeri insaed long COI ia blong lukluk iko long involvment blong MP Charlot Salwai mo jeaman blong Pablik Sevis Komisen Martin Mahe long impotesen blong ol materials.

    Mo tu blong lukluk iko alegesen se i kat 34 ekstra lagaj blong ol fruit mo seafood weh i tabu blong kam insaed long kauntri.

    Ol alegesen hemi from se Hon. Salwai mo Martin Mahe i bin pat long wan delegesen iko long Vietnam long yia ia we alegesen i kamaot se trip ia i lid iko long entri blong tufala vessel ia long Vanuatu.

    Mo sam nara man we oli pat long delegesen ia i inkludim Mr Joe Tran Nam we hem i Vanuatu konsul jenerol iko long Vietnam mo Yvon Basil we hemi direkta long dipatmen blong foren afea, Mr Alan Liki, sekreteri jenerol blong Citizenship Office mo las wan hemi Gerard Metsan weh hemi jif information ofisa.

    Ol memba we bae oli involve blong komplitim investigesen hemi Bill Bani we i jearem komisen ia mo Robert Agius we i stap olsem sekretari blong komsisen mo ol memba hemi Ben Wotu Leeshi, Kelson Bule mo John Nasak.

    Ofis blong Praem Minista i bin talem se bae i rekwestem wan COI long last manis, taem we hemi bin raisem konsen blong hem long tufala vessel ia.

    Bae komisen blong enquiry ia bae i mas finisim wan ripot within long 3 manis mo handem ova iko long Minista blong Jastis.

    Long aftenun ia pablik sevis komisen i bin rilisim wan stetmen we i rejectem ol alegesen we Praem Minista ofis i bin mekem abaot involvment blong ol senior ofisa blong PSC long breach we i involvem tufala Vietnamese vessel ia.

    Pablik seves komisen i talem se tufala vessel ia i karem wan laesens blong i operet long Vanuatu wota anda long wan lokol opereta we i bin saenem wan agrimen wetem Vanuatu kavman blong si kukamba bisnis.

    Stetmen i talem se PSC jeaman, Martin Mahe, i welkamem komisen blong inkwaeri mbe i talem se ol alegesen hemi baseless mo politikoli motivated blong faenem ol graon blong terminatem hem.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen