Akses long kakae, wota mo shelta hemi nambawan prioriti blong pipol i no angre mo kat ples blong haed.
Prime Minista blong Vanuatu, Ismael Kalsakau i talemaot long VBTC Post Cyclone Special Coverage se wan instraksen i ko long National Disaster Management Ofis blong no storem ol help we i kam ovasi blong i stap sting bakegen mbe givim aot long pipol daon long ol komuniti.
Hemi asurem evri pipol blong Vanuatu we oli afek long Saeklon se bambae oli kasem help mo communication i mas impruv blong kasem infomesen long ol eria.
“Yumi laki tumas se yumi kat fren long Wol, fes wan oli kam hemi Australia mo yumi talem tankiu tumas. Oli kam wetem tu plen wetem sam item we yumi storem long storage rum blong National Disaster Management Ofis, so yumi sendem wan instraksen blong no kolektem ol samting blong stap sting bakegen, taem oli kam nomo dividem i ko long Vanuatu mo serem long pipol. So hemia i fes wan we i kam. French kavman i kam tu so toktok ia Stand Ready oli bin talem long Vanuatu se afta long saeklon bae oli help,” Prime Minista i talemaot.
“Fes samting we bae yumi nid blong mekem, i blong mekem sua se man i no angre, yumi hidem olgeta we i nogat shelta, yumi pasem aot plante wota i ko raon mo ol health pipol blong mekem wok blong ol meresin i ko aot long pipol. Sapos yumi fokas long hemia nao bae rikari blong yumi i ko kambak kwiktaem.
“Mi askm ol pipol blong putum ol tinktink tugeta, Risen from wanem yumi nosave wok kwik blong helpem pipol hemi communication long ful Vanuatu i daon. Yumi kat wan wan system we i stap gud vinis we kavman i ko stap daon long doa step blong pipol; Mo hemia hemi long ol eria administrata, so oli nid blong ko raon long ol eria mo kolektem infomesen mo pasem i kam long ol provins, kam long National Disaster Management Ofis blong yumi save wok
“Naoia we i stap ia hemi had lelbet from ol komunikesen line hemi daon, so yu luk Unelco i tekem in ol grup blong New Caledonia i kam. Mo bambae yu luk HMAS Canberra bambae i kam insaed i no longtaem; i kat tri helicopter i stap insaed long hem blong oli tagetem communication from hemia nao bae yumi luk wanem nid nao i stap long plesia. Naoia i hard blong kasem infomesen so yumi wok long hemia fastaem bifo yumi blem ol rong blong yumi.
“Bambae yumi i kodinatem so bae hemi fair mo i ko aot long raet taem. Long pas yumi mekem rispon, ale mekem rikavari afta mbe naoia yumi ko from rispon mo rikavari. Rikavary operation senta i stat on vinis long moning ia blong tri manis antap long Prime Minister’s Ofis. Bae hemi no olsem Saeklon Pam we seven yia i pas mbe yumi stil tokbaot. Tim long National Disaster Management ofis oli no rest mo slip gud, mi trakem olgeta blong pipol i mas stap gud.”
“Yumi Vanuatu Wol i save yumi afta long Saeklon Pam olsem ol vulnerable pipol, hemia i minim se man Vanuatu bambae i kamaot long wan hard situasen mo bae hemi win, so taem naoia bae yumi soem long Wol bageken se tu saeklon mo wan earthquake mbe bae Vanuatu i save oltaem kambak, so hemi stap long spirit blong yumi. Yumi wok tugeta blong ol communication mo pawa line i kerap blong save help.”
Prime Minista i askem evriwan blong wok tugeta blong helpem pipol i rikava.
VBTC Nius i kasem infomesen se plante ples long Shefa mo Tafea i nogat klin wota mo plante kakae long karen i damej.
VBTC Post Cyclone Special Coverage theme hemi ‘Tugeta yumi strong, Tugeta yumi helpem yumi.’
