Ol kava fama long Big Bay coast, Santo i fesem had taem blong travel i ko long Luganville market blong winim vatu from plante ren i mekem rabis rod.
Eria Administrata blong Big Bay Coast Eria Council, Sul Neversevet, i talemaot long VBTC Nius se ren i spoilem bigwan rod long Mantatas i ko kasem long Sara, East Santo.
“Pua rod kondisen we pipol i dipen long hem bigwan blong ko long Luganville, i kat tumas hole long ol rod stat long Mantatas blong kasem tar seal rod long Lorevulko we hemi below Sara vilij, i mekem se ol fama blong kava i faenem i had,” Mr Neversevet i talem.
“Ren i mekem landslide we i afektem tu ol garen from pipol i planem kakae long hillsaed. Rod ia hemi 5 -10 kilomita olsem mo plante draeva blong ol trak i fraet blong aksesem long taem ia we tumas ren. Ol landcruiser ia oli fesem hadtaem blong kam long rod ia. Ol rod i mas gud from yumi stap pem tax i kam long Vanuatu kavman. Yumi wantem se i mas kat impruvmen long rod, from pipol i save mekem mani blong pem skul fi mo pem ol housing material.
“Afta long amas manis nao we Pablik Works i nomo kam blong fixim rod ia. Yumi nosave from wanem. Onli mein prodak we ol fama i mekem mani long hem, hemi kava. Mo onli ples we oli save travel i ko long Luganville hemi rod.
Long Septemba 2022, ol lokol i mekem smol wok long rod ia.
Acting Secretary blong Big Bay Council blong ol jif, Taka Jered i talem se oli kam tugeta blong wok from toktok ia unity hemi stampa blong sakses.
“Pipol i fesem had taem blong travel wetem ol produs olsem lokol kakae mo kava i ko long Luganville,” Mr Jered i talem.
Hemi talem se i kat faev bigfala hole we i stap long rod ia i nid blong oli mas berem blong mekem se i isi long ol transport blong save sevesem olgeta.
Prime Minista, Ismael Kalsakau i bin talem se wok blong fida rod bae i ko hed long Big bay bush.
“Tar sealing long Lorevulko kasem long Mantantas; Mantantas kasem long Malao, Tolomako rod, Pelvus kasem Malovuko rod; Malovuko kasem Vuno wetem Matapevui rod,” Prime Minista Kalsakau i talem.
Hemi talem tu se bae oli wok long Port Olry rod.
Prime Minista Kalsakau i talem se plan ia hemi blong fo yia taem, 2023-2026.
