Not West Malekula i fesem had taem blong ko long nara eria from bigfala flood we tropikol low bitwin Vanuatu mo New Caledonia i fesem.

Jerryson Hosea, Area administreita long Not west Malekula i talem se hemi wan bigfala risk.

“Naoia ol rod blong trak, ol trak i nomo save pas blong kros from hevi ren i damejem ol rod,” Mr Hosea i talem.

“Ol bigfala riva olsem Malope riva, solwota i raf, sanbij i blokem en blong riva, i mekem se wota i dip long ples blong kros. Evri skul i klos.

“Woning blong ren, strong inland, muvum aot ol bot canoe, olgeta we muv kolosap riva blong faenem wan sef ples blong stap long hem.

“Ol transpot draeva i mas putum gud trak long ol sef ples. Olgeta we wokbaot ko bush i mas be ol strong man nomo, ol pikinini mo mama i mas stap kwaet long haos.”