Atoriti blong Turism i mekem woning se sapos kavman i no adresem isu blong Air Vanuatu long nekis 4-6 manis bae i afektem bigwan ekonomik blong kaontri .
Chief Executive Ofisa (CEO) blong Vanuatu Turism Ofis (VTO), Adela Aru, i mekem woning ia long taem weh ol Business Haus oli meet wetem kavman long wik ia.
Wan long ol bigfala jalenj weh i stap kontinu blong afektem rekavari blong turism indastri long kaontri hemi ol flaet disturbens long nasonal ealaen blong Vanuatu.
CEO Aru, hemi talem seh ikat fulap komplen i kam aot long ol turism indastri raon long kaontri.
Long las wik VTO board blong ol direkta oli kat wan miting mo oli raisem isu blong nasonal ealaen long Minister risponsibol, Minsiter blong Trades mo Komes,mo oli askem seh wanem nao kavman i stap mekem blong help resku nnasonal ealaen blong kaontri.
“Yumi lukim i kat kontinues distebens, las minit kanselesen, espesili long ol ki piried olsem long Krismas, Easter, hemi afektem planteh long ol bisnis from lo turism ol bisnis oli wok wetem olgeta wholsaylas weh yumi kat ol fowod bukings up tu 6-8 manis , o sam bisnis oli kat buking weh i kasem 12 manis o 2 yia, mo taem i kat isu blong nasonal ealaen , yu afektem holidei blong wan visita weh hemi pem holidei blem in advans, ba hemi nokat wan gudfala experiens mo bae hemi afektem destinasen blong Vanuatu.”
CEO Aru hemi pointem aot seh wok blong VTO hemi blong promtem Vanuatu raon long wol beh wetem ol isu blong nasonal ealaen,i saveh spoilem tursim pija blong Vanuatu, olsem wan top turis destination
“Tru long ol konsuma risej weh mifala i antatekem long 2023, i kat planteh pend up deman long Ostralia mo Niu Zilan, howeva hemi kwaet jalenjing taem yu ko online, blong yu saveh buk lo websaet blong Air Vanuatu weh blong yu mekem buking hemi kwaet difikalt. Taem yu wok wetem ol maija wholsalas blong yumi aleh blong mekem buking tu hemi also difikalt, hemi klia showem nomo seh spos yu wantem mekem buking i kam long Vanuatu hemi no isi,”
Long Nasonal Ekonomik Invesmen Forum, weh Jeimba blong Komes hemi organizem ,wetem ol private mo kavman bisnis owna, hemi showem aot long wan survey, seh i kat sam bisnis kes weh oli klos daon, oli katem daon namba blong ol staff from i kat ongoing isu blong Air Vanuatu.
Hemi kosem delei long transpot mo hemi afektem namba blong turis long kaontri.
