Minista blong Internal Affairs, Andrew Napuat, i konfemem se wok i stap gohed blong seekim approval long Council of Ministers blong Ministry blong Internal Affairs mo Foreign Affairs oli jekem ol wok blong ol Trade Commissioners blong Vanuatu.

Long las wik, Monday 10 Februari, Minista Napuat i saenem wan oda blong tekemaot ol Trade Commissioners long list blong olgeta we oli usum diplomatic passport. Disisen ia i kamaot folem plante concern we pipol i bin raesem long saed blong yus blong passport.

Long ol Trade Commissioners we oli stap holem finis diplomatic passport, Minista Napuat i talem long VBTC News se evri wan long olgeta oli mas submitim wan ripot i go long gavman long ol wok we oli stap mekem bifo wan disisen i save tekem ples long status blong diplomatic passport blong olgeta.

“Long las wik, mi lukluk finis wan draft pepa we mi wetem Minista blong Foreign Affairs bambae i saenem tugeta blong karem i go long Council of Ministers. Pepa ia i gat sam rekomendesen long saed blong olsem wanem gavman bambae i handlem kwestin blong ol Trade Commissioners mo ol diplomatic passport blong olgeta,” Minista Napuat i talem.

Hem i talem se olgeta Trade Commissioners we oli stap holem finis diplomatic passport bambae oli mas submitim wan ripot i go long Foreign Affairs long ol wok we oli stap mekem blong benefitim Vanuatu. Ripot ia bambae i go long Council of Ministers blong mekem wan final disisen long saed blong ol entitlement blong olgeta.

Pasport Investigation I Gohed

Trade Commissioners oli no stap long list blong olgeta we oli entitled long diplomatic passport, be long yia 2022, Palamen i bin includem olgeta long list ya.

Minista Napuat i talem tu se gavman hemi bin appointem finis commission of inquiry blong investigatem ol issue we oli kamaot long saed blong citizenship mo passport.

“Yumi no mas stop long ples ya, investigation i mas gohed. Yumi stap wet long ripot blong Commission of Inquiry we i stap wok long saed ia. Gavman i no wantem interferem long investigation ia mo bambae i wet nomo blong kasem ripot taem wok blong olgeta i finis.”

I no klia yet wanem date nao Commission of Inquiry bambae i putum aot ripot blong olgeta, be VBTC News i kasem save se oli bin askem tu time finis blong i gat wan extension blong ol wok blong olgeta. Gavman i stap wet long ripot ia blong save tekem next step long saed blong passports blong Vanuatu.