Sunday, May 19, 2024
28.8 C
Port-Vila
Sunday, May 19, 2024
More

    Internet bill-Palemen

    Tri internet bill bae i ko long Palemen Fes Extra Ordinary Session long May long eim blong klin mo sef digital spes.

    Ol bill ia i kat Digital Safety Authority, Data Protection mo Privacy wetem Harmful Digital Communication Bill.

    Policy Analyst long Ofis blong Government Chief Information Ofisa, Clayton Ezekiel i talem se i kat plante harmful infomesen we i stap ko aot long internet.

    “Yumi save se i kat plante personal infomesen blong yumi we yumi stap kivim o serem aot so yumi wantem protektem blong gud blong ol citizen blong Vanuatu,” Mr Ezekiel i talem.

    “Yumi wantem eni infomesen we i kolek o aot long Vanuatu hemi mas stap nomo insaed long kaontri. Long Harmful Digital Communication bill, yumi save se fulap content oli harmful we pipol i stap serem naoia so yumi wantem bill ia hemi pas blong hemi save helpem yumi blong protektem environment blong cyber spes we yumi ol citizen i save yusum long raet wei.”

    Cyber Security Technical Advisor long CERT Vanuatu, Jeffrey Garae i talem se taem ol bill ia i pas bae i kat consaltesen stat long Torres kasem Aneityum.

    “Consaltesen yumi bin karemaot long Santo, Port Vila mo Tanna mbe taem i pas bae yumi ko raon long ol aelan blong tekem tinktink blong pipol long hem,” Mr Garae i talem.

    Wan ofis bae i set blong lukaotem mo mekem i wok ol bill ia taem hemi pas.

    “Wan tasfos komiti we oli setem ap mo lukluk long trifala bill ia, so oli wantem se bae yumi establishem wan institution we bae hemi manejem data proteksen mo privacy legislation wetem harmful digital communication from bae tufala i kat own legislation blong tufala mo own implementaion,” Mr Ezekiel i talem.

    Mr Garae i talem se Cybercrime bill we hemi pas long 2021 hemi kavemap nomo ol ofens long mobile fon mo computer.

    “Mbe hemia sapos i pas bae i lukluk long ol harmful content we cybercrime i no kavemap,” Mr Garae i talem.

    “So bill ia bae hemi help long saed ia nao sapos ol kes i ripot long Vanuatu Polis.”

    Trifala bill ia i kat ol penaliti blong hem sapos man i brokem mbe State Law Ofis nao bae i kamaot klia blong talemaot taem hemi pas long Palemen sitting long May.

     

     

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen