Monday, July 15, 2024
25.5 C
Port-Vila
Monday, July 15, 2024
More

    International boda i mas open

    Kavman i stil stanap strong blong Intanasenal boda blong Vanuatu i open long March.

    Deputy Prime Minista mo semtaem Minista blong Internal Affairs, Honoroble Ismael Kalsakau, we i stap spendem holidei naoia long New Zealand i konfemem long VBTC Nius tete moning.

    Mr Kalsakau i talem se Prime Minista, Honoroble Bob Loughman, i bin mekem anaonsmen ia long 2021 mo kavman i stil stik long hem.

    “Boda hemi mas open blong enobolem economic blong breathe blong yumi save kontinu olsem wan develop kaontri from hemia nao hemi taget, “Mr Kalsakau i talem.

    “Kavman bambae hemi might review o lukluk bak long plan ia long nekis manis olsem. Bae yumi no tekem longtaem blong developmen i kasem yumi.

    Minista Kalsakau i kohed blong talem se naoia Vanuatu i mas akseptem se COVID-19 bae i stap oltaem mo pipol blong Vanuatu i mas muv i ko long foret.

    “Sapos we i kat wan solution blong COVID sik bae ol bigfala kaontri i faenem longtaem vinis, “Mr Kalsakau i talem.

    “COVID i kam blong stap semak olsem ol nara virus olsem measles, flu, HIV/AIDS mo ol narafala sik , mo yumi mas save hao blong manejem yumi blong laef long tumoro ia. Ol pipol blong New Zealand mo ol nara kaontri i faenem wan rod vinis, oli stil wokbaot olbaot wetem ol fes mask. Sik ia i stap mbe ating hemi atitude o fasen blong ol pipol nao long hao oli tagelem, i no weta yumi bildim moa hospital o kat moa ventilata from sik ia bae i no ronwe. Yumi mas step ap blong wokbaot olsem stetas blong wan develop kaontri.”

    Chairman blong Vanuatu Chamber blong Commerce mo Industry we i lukaotem Private Sekta, Antoine Boudier, i bin kol blong pipol i no wet mo ko tekem COVID vaksin blong stap sef.

    Mr Boudier i rimandem pipol se kavman stimulus pakej mo fokas long prodaktiv sekta hemi blong shot term nomo.

    Owna blong multi -award wining resort long Vanuatu, The Havannah Resort, Greg Pechan, i talem se hemi traem blong kipim staff blong hem long nomol salari mo ranem hotel we hemi talem se hemi rili had.

    Risot ia hemi wan long ol multi-awod wining risot long Vanuatu we naoia i operet tri taem long wan wik.

    Bernie Millman, Acting Chief Executiv Ofisa blong Iririki Island Resort, i talem se risot ia hemi wan kwarentin fasiliti mbe hemi no mekem profit nomo aot long ol repatriation.

    Mbe sam pipol i komen long social media se hemi no wan stret wei blong openem boda from i nokat gudfala health fasiliti.

    Minista blong Health, Honoroble Silas Bule, i admitim se COVID vaccine rolaot long Efate i slow mo international boda i nosave lokdaon olwe.

    Ministry blong Health i kontinu blong askem pipol blong ko tekem COVID stik blong stap sef sapos boda i open mo i kat outbrek blong coronavirus from i nokat enaf fasiliti long Vila Central Hospital.

     

     

     

     

     

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen