Hemi impoten blong kat wan Nakamal blong ol Jif blong talemaot ol toktok blong hem mo lukaotem pipol.
Presiden blong Malvatmauri Council blong ol Jif, Jif Wemal Tuwo Vanu Willie Grey Plasua i talem toktok ia long radiothon we Vanuatu Broadcasting & Television Corporation wetem Malvatumauri Council blong ol Jif mo Ministry blong Justice i organisem wan fo dei radiothon ‘Ol Jif oli Singaot’ long wik ia.
“Tete yumi kat skul mo ol nakamal long wan nasara; Long bifo nakamal blong ol jif hemi ples blong governance,” Jif Plasua i talemaot.
“Malvatumauri yumi tekem nem ia long tri ples; Long Not, Central mo Saot Vanuatu. Mal hemi minim wan pidgin olsem otoriti, Vatu hemi rock o stone mo Mauri hemi minim wan sef ples.”
“So long plesia nao hemi impoten blong kat wan niu nakamal blong lukaotem ol pipol. Nakamal we i bon ia hemi luksave ol difren nakamal long ol komuniti blong yumi long Vanuatu. Hemi solvem plante problem mo putum pis oltaem.”
Chief Executive Ofisa blong Malvaumauri, Jif Jean Pierre Tom i talem se hemi wan sad taem, taem hemi kasem wan kol long eli moning se faea i bonem daon nakamal ia.
“Hemi no wan isi moment, feeling ia hemi rili harem nogud; mi tinktink bigwan, mi sitaon from i hard blong mi swalem daon nius we mi kasem,” Jif Tom i talem.
“Mi kolem Jif long eli moning long taem ia, mi no wantem mekem hemi sek so mi jes talem nomo se sori yumitu i kat wan isu pa mi kam pikim ap yu, so mitufala i kam nomo taem stap enterem eria blong nakamal ia mbe i nomo kat toktok blong 15 minit olsem. Mi hapi nomo se Jif Plasua i handlem hem wan oraet from hemi kat courage.”
Mr Tom i talem se investigesen i stap ko hed mo oli luk fowod long finding blong oli save plan tu long hao blong bidlim wan sef nakamal blong ol jif long fiuja.
“Taem ol fire fighta oli kam, mi talem long olgeta nomo se oli mas sefem ol bigfala post ia nomo mo no wari long natangura,” Mr Tom i talem.
Long tete moning, Minista blong Justice mo Community Services, John Still Tariqetu i fes man blong donate long VT50,000.
Hemi askem ol pipol blong kam soem sapot blong olgeta long fo dei radiothon ia we i stap antap long Jif Nakamal long wik ia.
Long olgeta we oli stap long ol aelan mo ovasi oli save donate long wan akaon long Bred Bank Vanuatu, akaon nem hemi VBTC Events wetem akaon namba hemi Account Number: 107783010018.
I kat 68 eria council blong ol Jif long Vanuatu.
Faea i bin bonem daon Jifs Nakamal long January 29 delaet 30 January.
