Ifira Blak Bird Futbol Klab emi still topem profesionel klasmen blong Port Vila Futbol Asosiesen (PVFA).
Taem emi stap lidim lada wetem 51 point long dei 20 blong Vodafone Primia Lik.
Infomesen we VBTC Sports emi karem long PVFA i soem Galaxy Futbol Klab emi kam seken long klasmen wetem 50 point.
Faet naoia i stap bitwin Ifira Blak Birds Futbol Klab mo Galaxy Futbol Klab blong wan long tufala nao i save kam jampion blong PVFA long sisen blong 2022-2023.
Emia afta we tufala klab i stap lid long wan hae sko kompea long ol nara klab.
Wetem ol infomesen ia lik i kat 2 moa mats nomo i stap blong vinisim off sisen blong 2022-2023.
VBTC sports i karem infomesen tu se tufala laswan long klasmen blong Vodafone Primia Lik i save drop daerek iko long fes divisen.
Mauwia Futbol Klab emi drop daerek iko long fes divisen afta we emi kat nomo 2 point aot long 20 mats we emi bin pleim.
Naoia i stap faet blong pulum win long primia lik long nekis sisen i stap bitwin Penama FC, Seveners United FC mo Sheperds United FC.
Pango Grin Bird Futbol Klab mo Naka Futbol Klab emi tufala klab we oli sekiurim spot blong olketa vinis long primia lik long nekis sisen blong 2023-2024.
