Vanuatu Pro Medikol hemi ripotem 2 kes blong shark attack long manis ia long Port Vila harba we hemi involvem wan turis blong Canada mo wan smol boy we slip long Pango.
Fes kes blong shark attack hemi blong wan whiteman we shark kakai hem long las wik long Satedei namba 20 mo nara ripot hemi blong wan smol boy we i kamaot long Wednisdei long wik ia.
Tim blong Pro Medikol oli ripot se whiteman ia we hemi wan turis long Canada mo hemi slip long Malapoa Estate.
Ripot i talem se hemi stap swim let long Port Vila harba lo 9 oklok long naet taem wan shark i kakai leg blem.
Whiteman ia we nowantem putum aot nem blem i swim kasem shore mo hemi karem help long sam man we oli fasem antap long leg blem wetem sam calico blong stopem blad.
Olgeta man ia oli putum hem tu long wan bus blong kasem Vila Central Hospital.
Turis ia hemi travel kobak finis long Canada blong oli mekem tritmen lem.
Nara kes blong shark attack hemi blong wan smol boy we kat 8 yia nomo mo nem blem Bodie Monterio mo hemi slip long Pango point be shark i bin kakai hem long Woroulua long Ifira Point.
Lenise Monteiro we hemi mami blong smol boy, hemi ripot se Bodie hemi stap ski long solwota wetem bigfala brata mo Dadi blem long wan let aftanun bifo wan samting e pulum aot hem long ski bot blem.
“I ran down the water edge and I saw his foot, he had his foot up on his surfboard and I could see all the blood,” hemi talem.
Mrs Monteiro hemi talem se oli karem smol boy blem kobak insaed mo fasem leg blem long wan smol tawel mo oli tekem hem kolo Vila Central Hospital long 7 oklok long naet.
Hemi tok moa se hemi sek se shark i kakai hem long wan shallow ples nomo we solwota no deep tumas mo kasem bel blem nomo.
“He was afraid, he didn’t know what happened but he knows something bit him, he didn’t see anything but when he got the first tug and bite on his foot, he got pulled backwards off his surfboard and into the water. “
“We’ve always taught him not to panic, once he got pulled off the board, he waited in the water and he didn’t thresh around, he didn’t splash and he got back up on his board as quickly as he could and he screamed and called for help.”
Mami blong smol boy hemi tok moa se oli kasem hospital mo stap smol time nomo bifo oli transportem Bodie kolo Niu Zealan long nekis dei blem.
Hemi talem se ol dokta mas mekem longfala tritmen long leg blem mo bae mas stap smol time blong kam gud bifo hemi save travel kambak long Vanuatu.
Wan ofisa blong Vanuatu Paramedics, Pascal Nako hemi tok moa se hemi wan “rare” kes o wan kes we neva kat long Port Vila blong yumi lukim ol shark attack long habor blong yumi.
“Advise hemi ko long ol pipol blong oli mas lukoat gud long olgeta taem oli swim long solwota,” hemi talem.
“Yumi stap long wan taem tu se yumi nosave se shark hemi stap attack from wanem, mifala no save be mifala advisem nomo se no kolo solwota yu wan o yu mas ko wetem wan grup mo sapos yu wantem swim no mas ko tumas long deep ples.”
Hemi talem se ol famili mas stap sef oltaem taem oli swim long solwota mo lukoat gud long olgeta.
Pro Medikol tim oli wok wetem Pro Rescue mo Vanuatu Maritime blong lukluk long ol shark attack kes olsem.
