Port Quimi Clinic we i stap provaedem helt seves long ova 500 pipol blong Saot Epi hemi nokat nurse practitioner sins 2021 i mekem se pipol i spendem bigfala vatu blong travel longwe blong kasem seves ia long Not Epi o Tongoa aelan.
Wan Reliable Sos i konfemem long VBTC Nius.
Hemi kwestenem se from wanem i kat ol helt fasiliti long clinic mbe i nogat wan kwalifae nurse blong wok long hem?
“Clinic ia hemi kat seves olsem Outpatient mo maternity ward mbe kasem naoia pipol i mas travel aot long Saot Epi i ko long Vaimali Health Senta long Not Epi mo Sulumauri Health Senta blong kasem seves blong health; Pipol i pem boat blong kasem Sulumauri Health Senta hemi araon VT15,000 wan wei mo oli mas pem trak blong kasem clinic bae hemi cost VT20,000 we hemi sas tumas,” Reliable Sos i talem.
“Yumi kat ol availabol fasiliti i stap vinis long clinic mbe from wanem i no yus? Blong kasem Saot Epi long Vaimali Health Senta hemi araon long VT25,000 wan wei long bot mo trak bae hemi VT30,000.”
I bin kat wan nurse blong Solomon Islands i bin serve long Port Quimi Clinic long 2020.
VBTC Nius i kasem infomesem se isu hemi taem pipol i tokbaot ol stori blong Saot Epi se akses long seves i hadwok mo alegesen blong black magic i mekem se ol wokman blong Kavman oli fraet blong kam wok.
Long rispons, Management blong Shefa Helt i talem se isu ia hemi wan longtaem isu mo seves i stop from i kat ol ripot blong insiden we i rileit long sefti blong ol staff.
Shefa Helt i talem se hemi no fastaem we ol kaen fasin olsem i hapen taem i kat ol nurse i beis long clinic, ova 3 staff i fesem jalenj long wok folem ripot blong alej black magic mo wan kolosap i kasem sik long hed(Trauma). So oli kolem on komuniti wetem SDA mission blong lukluk long mata ia blong seves i save ko hed.
Wael isu ia i no fix yet, Shefa Health i wok wetem wan komuniti lida blong Saot Epi mo oli statem wan temporari dispensary sins 2022.
Naoia we i stap, ol studen blong Port Quimi Junior Secondary Skul i stap klinim yard blong clinic wetem help blong ol pipol long komuniti.
Seventh Day Adventist(SDA) Jej i bildim Port Quimi Clinic wetem hemi tekem ol helt fasiliti mo Kavman nao hemi provaedem ol nurse mo tul blong clinic.
