Ol Health Ofisiol i kleim se ol Chinese nationals we oli kasem ‘spesel tritmen’ tete blong tekem fes wan bosta dose long Port Vila vaccination senta hemi ol dokta we kondrak i en.
Acting Director long Public Health, Dr Jenny Stevens, i talem se ol Chinese National ia i sud tekem COVID-19 bosta stik long sam wik ia pas blong travel aot mbe straek blong ol COVID voluntia i dileiem.
Dr Stevens i talem se hemi wan Vanuatu-China akrimen we ol kondrak blong olgeta i vinis long Vila Central mo Northern Provincial Hospital mo oli sapos blong kobak long China.
“I tru se i kat komplen i kam se from wanem i kat tu grup, chinese mo ol Ni-Vanuatu mbe long wik ia COVID vaccination eria i open long pablik mo prioriti,” Dr Stevens i talem.
“Isu we i kamaot hemi no blong pipol i mekem tumas noise long hem from hemi wan mata blong mis-komunikesen i ko long pipol blong andastan.
“Ol grup blong chinese national ia i sud ko long las wik vinis mbe from isu blong straek i mekem se tete i kat tu grup.”
Dr Stevens i talem se i no sud kat tu line blong tekem bosta dos long tete.
Shefa Public Health Manager, Obed Manwo, i talem se i nokat discrimination long COVID vaccine eria long Port Vila.
Mr Manwo i talem se hemia i sam rikwes long level blong Ministry blong Health afta oli stat aksenem long operation.
Hemi talem se hemi no festaem we i hapen from i kat plante grup oli kam tru long ol hae level akrimen blong tekem vaccine long ol prioriti grup.
Mr Manwo i talem se i kat fo prioriti grup blong bosta stik blong COVID-19, wan hemi ol health mo ol frantline wokman, ol oldfala, ol pipol we oli kat ol nara sik olsem sik suka mo hae blad presa mo olgeta we bae oli travel aot mo kambak faev manis.
Mbe ol eye witness oli denyem kleim blong Ministry blong Health mo talem se plante long ol chinese national ia oli ol bisnisman long kaontri.
Sam pipol we oli no wantem nem blong olgeta i kamaot i talem se hemi no fea from se oli wet eli moning vinis, i nokat gudfala shelta from heat blong sun, i nokat akses long toilet mo wota blong drink.
Ministry blong Health i no kamaot klia wetaem ol Chinese dokta ia bae oli aot long kaontri.
