Vanuatu Crime Prevention long Port Vila i rikodem hae namba blong underage drinking.
Sergeant Rayndol Ala long Vanuatu Polis Fos i talem se hemi wan yut isu we i kerap bigwan long ol nomol dei blong wok.
Mr Ala i talem se Vanuatu i mas fixim isu ia kwiktaem bifo i afektem kaontri long futja.
“Rikod blong polis i soem se ol ofenda naoia ol yangfala nao i fulap,” Mr Ala i talem.
“Hemi wan nid blong yumi mas adresem folem ol asesmen we polis i luk long pas manis. Long ol wik dei, yu luk ol studen, oli drong long rod o long ol kona olbaot ia nomo.
“Sam oli 13, 14 yia mo sam oli ova long 18 we oli stap drink long ol pablik ples. Even long naet yu wokbaot yu luk plante yut ia long rod.
“Olsem hemi oraet from oli kat fridom blong wokbaot be i kambak long yumi ol parents blong yumi mas tinktink long wanem i stap hapen long olgeta. Bae yumi no blamem ol yangfala ia be yumi askem yumi wan se, yumi jekem ol pikinini long naet bifo yumi slip o nokat.? o yu toktok lem taem hemi kambak long skul o? Yumi mas lukluk yumi ol parents bakegen ia. Isu hemi long hom nomo ia, hao yu toktok gud long ol pikinini.”
VBTC Nius i luk long Friday taem Vanuatu i openem bakegen boda blong hem, plante studen i drong mo stap wokbaot long town.
Mr Ala i talem se hemi taem blong toktok plante wetem ol yangfala blong helpem olgeta i kat wan gudfala laef mo tu helpem wok blong ol polis.
