Praktis blong lego toti i stap long envaramen longtaem i kosem hae namba blong ol yelo crazy mo fire anis.
Ripot i kamaot se yelo crazy ant long popula Mystery aelan i kam plante from pipol i stap ko long smol aelan ia.
Yelo crazy ant hemi wan long ol top faev insek long Wol we hemi kam insaed long kaontri folem muvmen blong ol pipol.
Ripot we asesmen tim i mekem long Mystery aelan, i soemaot se ol yellow crazy ants oli liv mo save brid long ol ples we toti i fulap long hem.
Hemia from COVID -19 lok daon, i mekem ol pipol oli nomo klinim aelan ya, mo toti i kontiniu blong pael up.
Bill Garae we i lukaot long helt blong ol plant, i tokbaot ripot we Bio-Securiti i karemaot long asesmen ia.
“Long taem we i nogat wan aktiviti i hapen (long Mystery aelan), i mekem se populesen blong anis i nogat distepens long hem, mekem se i gro,” Mr Garae i talemaot.
“Oli fomem ol super kolonis (plante ples we oli layem ol egg) long wan sqweia mita.
“Long wan sqweia mita, yu save faenem 2 o 3 mount blong olgeta,” Mr Garae i talem.
Hemi talem se yelo crazy ants, hemi wan danger long ol nara animol, mbe tim i no bin gat i naf taem blong mekem ful asesmen.
“Long Mystery Aelan, i gat ol crab, smol lizard, mo sam nara smol insek we yelo crazy ants i savem kilim olgeta.
“Bai i gat wan ful asesmen we bai mifala i faenem aot stret impak we yelo crazy ant i stap mekem.”
Hemi talem se asesmen ia bai i tekem ples long neks yia, taem ol kavman ofis i open bakeken.
Mr Garae i talem se tim i finemaot wan eria blong faea ants nomo, be hem i moa danger long yelo crazy ants from hemi kakai nogud man.
Eria administrator blong Aneityum, hemi talem se pipol i stap manegem namba blong tufala anis ya.
“Spos ol bot oli wantem go long Mystery Aelan, oli mas meksua se inogat yelo anis long hem.
“Semak long komuniti, oli save ol ples finis we ol anis ya oli stap long hem, bai oli no mas go klosap blong save karem anis ia wetem olgeta,” Mr. Garae I talem.
Biosecurity ofis i askem ol pipol blong Aneityum blong kontiniu blong kipim ples i klin oltaem kasem taem neks tim i ko daon blong tekem ful asesmen.
by Tiffany Baldwin.
