Inkris blong praes long ol goods long stoa hemi no stap long kontrol blong Price Control Unit taem bigfala namba blong ol kakae i kam ovasi.

Minista blong Finans mo Economic Management, John Salong i konfemem.

“Yumi save se plante inkris long ol kost we oli kolem inflation hemi impoted; hemia i minim se ol samting we yumi karem i kam ovasi, praes i ko antap,” Minista Salong i talemaot.

“So taem ol praes blong ol tink i kam ovasi, yumi i nosave kontrolem. Wan samting sapos praes blong hem i ko antap long Vanuatu, olsem kumala, yumi save lukluk long hao nao yumi save katem daon praes blong hem. So insaed long praes blong evri item, i kat wanem yumi kolem ol input cost.

Minista Salong i talem se man i factorem ol cost blong runnem business blong em blong save kamap wetem praes blong final good.

Hemia i stap long pawa blong prodiusa.

“So sapos exempol man bae emi inputem amas haoa blong go planem, widim kumala o meintenem fens blong mekem sua se Pig i no kakae kumala, emi emi mas factorem ol cost ya, se hemi wok amas haoa blong mekem kumala i gro,” Minista Salong italem.

“..mo afta faenem kost blong weavim basket afta fulum ap i ko insaed, sitaon long maket mo salem afta transpot blong tekem i kam. So yu adem tugeta ol praes ia nao yu putum praes blong basket blong kumala. So sapos yumi save mekem se input kost ia i save ko daon long sam level, then mbai praes blong kumala tu i save ko daon.”

Minista Salong i talem se wetem ol imported goods, ol aotsaed market nao oli putum ol praes (price determiner) folem ol input cost blong olgeta.

Hemi talem se Vanuatu hemi wan praes taker mo no wan price maker.

“Mbe taem yumi tokbaot ol kakae o ol samting we i kam ovasi,… Yumi no setem praes, yumi jes tekem praes; So wanem praes oli setem blong yumi, hemia nao,” Minista Salong i talem.

“Price Control Unit hemi wan tinktink blong yumi save kontrolem ol import kost. So long wanem mi luk long ol ripot, hemi soem se oli stap monitarem ol praes long ol senta olsem Tanna mo ol nara ples mo oli stap mekem stadi blong luk se praes blong wan cabin biscuit long Lenakel kompea long Luganville i olsem wanem? Mbe blong talem long wan man se praes blong yu i mas ko daon hemi wan disisen we long Vanuatu diman mo saplae i talemaot praes.

“So sapos man i no pem cabin biscuit, oli ko kakae wild yam. Afta man we i stap salem cabin biscuit ia bae i luk se man no pem bae i katem daon praes.

“Mbe taem i stap sale, man i ko hed blong pem bae praes i neva ko daon.

Mr Salong i talem se taem praes blong wan samting long sto o maket i hae, man i mas jus blong no kakae biscuit mbe banana.

Hemi talem se hemi gud blong lukluk long ol eria ia.

Mr Salong i talem se bae oli wok blong impruvum Price Control Unit folem limit risos.