Saeklon Harold mo COVID-19 i bin afektem bigwan ol mama mo ol pikinini.

Vanuatu Women’s Center i bin faenemaot tru long wan prokram blong mobile kaonseling we hem i bin ranem i no longtaem i pas.

Anda long program ia, ol ofisa blong Vanuatu Women’s Center long ol provins i bin ko raon mo toktok wetem ol mama mo ol pikinini we saeklon i bin afektem olketa.

Kathy Bani, long Sanma Counselling Center, i talem se faenans hem i wan prioriti eria we plante woman i faenem i had blong kasem long taem blong ol disasta ia.

“Ol woman we oli live long single live, plante taem bae oli nidim faenans blong sapotem olgeta wetem ol pikinini blong olgeta,” hemi talem.

Shina Timothy, long Malampa Counselling Center, i talem se, “Wanem we mi faenemaot i niu long ol eria we oli afekted long Saeklon Harold espeseli long ol mama wetem ol pikinini.”

“Oli no bin save wanem blong mekem long taem blong Saeklon Harold.”

Hem i talem se plante infomesen we i kam ol mama espeseli oli no bin kasem gud wanem blong mekem. Ol infomesen i no bin klia inaf abaot wanem blong mekem long taem blong ol disasta ia.

Ruth Iavllu, long Tafea Councelling Center, i serem lukluk blong hem long ol woman mo pikinini long Tanna, long hao oli bin afekted long disasta blong volkeno.

“Oli nomo gat intres blong ko long garen, blong mekem smol smol garen blong sapotem living blong olgeta, from nomo se taem wea asis blong volkeno i foldaon ol crop oli ded everiwan.

“So i mekem se oli stap nomo long haos mo mein inkam we mifala i ko mifala i luk hem i oli weavim mat nomo blong kasem mani. Mifala i luk se ol woman oli wok had tumas.”

Sam long olgeta ofisa blong Vanuatu Woman Centre long olgeta provinces, i bin kambak long Port Vila mo  kivim ol ripot blong olgeta.

Mo oli kam ap blong faenem sam solusen long olsem wanem blong save adresem ol konsen we i kamaot.