I kat tu bisnis ona mo wan lokol we oli kat wan niu tingting blong helpem klinap Port Vila.

Olgeta oli askem ol pipol blong pikimap 3 pis blong toti long Port Vila taon evri dei.

Tingting mo wokbaot ia hemi wan gud wei blong lukoatem gud mo protektem enviromen blong yumi.

Tufala bisnis ona ia hemi Lis WorWor we hemi lukoatem Jills Café, Catherine Boudier-Contant we hemi Manejing Direkta we long First National Real Estate mo wan advokat, Milroy Cainton.

Mrs Worwor hemi talem se folem tumas smolsmol toti we ol pipol oli stap sakem olbaot long taon i putum wan nokut pikja long ol turis we oli stap kam visitim yumi.

“Yumi kat fulap bins long taon be fulap man oli nosave se bin hemi blong wanem oli tinkse emi ol dekoresen nomo blong taon,” hemi talem.

Bisnis woman ia hemi tok moa se hemi no ol bigfala toti be hemi ol smolsmol pis toti olsem plastic blong loli, ol ice kream, ol can, ol botel mo toti blong pinat we oli sakem lo windoa or taem oli wokbaot.

Tufala ona oli involvem ol staf blong tufala tu blong pikimap 3 pis blong toti evri dei mo hemi se gud blong ol pipol traem jenjem mentaliti blong olgeta. 

“I olsem taem yu invaetem ol man kam long aos blong yu bae yu wantem aos blong yu bae mas klin mo naes gud, ol plet oli wasem, floa hemi mas klin mo taim ol turis oli kam oli luk yumi nosta klin up gud ples blong yumi long taon,” Mrs Worwor i talem.

Hemi talem se ol wokman blong Municipal oli wekap evri moning blo help blong klin up mo oli bin sta mekem bigfala wok evri dei be hemi no naf mo i nidim yumi evri wan blong sapot.

Manejing Direkta blong First National Real Estate, Catherine Boudier-Contant i talem se hemi nidim wan komuniti efot blong kipim taon i klin mo ol hemi wok blong ol papa mo mama tu blong mas edukatem ol pikinini blong olgeta blong oli no sakem toti olbaot mo usum bin.

“Olgeta nao oli mas lanem edukesen blong ol pikinini blong save how blong rispek, pikap, klin, talem tankiu mo byebye, ol isi samting nomo blong tijim pikinini,” hemi talem

“Hemia no jej o skul be ol papa mo mama mas talem long olgeta.”

Mrs Boudier i talem se bae tufala bisnis emi sponserem ol bin blong toti nekis wik blong ol man long pablik oli mas save sakem ol toti long hem mo hemi enkarejem ol nara bisnis aos tu blong oli joen long wokabaot ia.