Wan yang Ni-Vanuatu seasonal woka we i stap wok long wan meat factory long Victoria, Australia blong tu yia nao i talem se gudfala managmen blong mani ovasi i helpem famili bigwan long Vanuatu.

Taem hemi stori wetem VBTC Nius long tete, Seasonal woka ia we hemi no wantem nem blong hem i kamaot, i kat 27 yia i talem se mani i stap long Australia mbe ol woka i mas manejmen gud olgeta wan.

Hemi talem se hemi glad from hemi yang mo hemi nogat famili yet so hemi lanem vinis hao blong manejmen mani we samtaem hemi hard.

“I kat plante temptation olsem drink, klab o ol woman mbe i mas kat strong tinktink blong taem peidei, yu sepereitem mani blong yu, smol i ko long savings, skul fi, rent mo kakae; Mifala i kam ia, mifala i glad from mani i helpem famili; Mi pem wan graon vinis, naoia mi stap wok from wan haos afta mi stap helpem mama mo papa blong pem skul fi blong sista we las yia blong hem nao long University blong South Pacific(USP) wetem wan smol brata we bae i mekem yia 10 nao long Rensarie skul long Malekula.

“Mi glad from mi helpem mama mo papa. Tete ol samting long sto mo living standard i hae, yumi mas manejem gud yumi. Hemi festaem we mi travel i kam long Australia long 2021, mi kam mi stap drink beer mbe mi luk se hemi wan samting we i westem mani afta mi leko.”

Seasonal woka ia i talem se oli hapi long working kondisen mo pei mbe hemi bin tekem patience.

“Festaem we mifala i kam, mifala i pei VT50,000 long wan wik afta i kat ol ditaksen; Afta long ol ditaksen long mani naoia mifala i kasem VT80,000 -VT90,000 long wan wik; Oli pem mifala long haoa mo level blong wok, so mi wok blong mi, mifala fokas long kil blong sheep; oli kilim sheep vinis, mifala ko mekem ol wok olsem karemaot ol skin blong hem o katem aot ol meat long hem, mifala i stat long 6o’klok long moning, 9am break, 12;30 long lunj taem break blong 30 minis mo vinis long 4pm,” Hemi talem.

“Afta long ol ditaksen, kampani i provaedem ples blong slip long sam woka. Mi rent mi wan mo mifala i pem bed long VT15,000 long wan wik. I kat faev level blong wok we oli pem yu lem, fes wan hemi pei we ditaksen hapen lem, level 2 ditaksen i vinis, level 3 nao yu wok had kasem 5 we i rikwarem knife.

“Mifala i wok insaed long wan bigfala factory; Factory bae yumi talem se hemi stap long Tagabe kasem long Nambatu ia. Long wan dei olsem 5000-6000 sheep mo buluk i ded blong mifala i wok long hem.

Seasonal woka ia oli kam long taem blong COVID pandemic long Australia mo Labour nao i sendem olgeta.

“Mifala i 32 evri we mifala i kam wetem ol nara grup blong ol nara agent, mifala i kwarentin long Tasmania(Saot Australia) afta jes muv i ko antap long Victoria; Sins mifala i kam ia 4 aot long mifala nomo i abscond(oli ronwe ko wok long wan nara ples); Wanem we i holem taet mifala, hemi mifala i oltaem worship long Sunday mo toktok long mifala blong stap strong oltaem wetem tinktink blong wok blong helpem famili,” Hemi talemaot.

“Mifala i tok raon long ol isu blong drink mo ol nara problem blong mifala i no mas pat long hem.Kampani we mifala i stap long hem i alaoem ol woka blong drink long ol wiken mbe mifala i tekem wetem limit.”

Seasonal woka ia i talem se wan priviledge long kampani hemi blong hemi save kambak spendem 1-2 wik wetem ol famili mbe mani blong hem i semak nomo.

“Yumi kam blong wok ovasi olsem ol ambassador blong Vanuatu mo wei ia nao bae yumi givim trust i ko long ol boss blong yumi blong ol rikruitum moa Ni-Vanuatu blong kam long Australia blong wok,” Hemi talem.

“So taem yumi wantem ronwe, yumi tinktink gud fastaem. Mifala i wantem stap ronwe mbe from labour i sendem mifala so mifala i fraet se pa mifala i nomo kat janis blong travel mo mekem mani olsem so i mo gud stap nomo mo wok.

“Taem mifala i sik, mifala i kat health insurens. So i gud blong kavman i lukluk plante long olgeta we oli fesem jalenj long ol nara farm long Australia tu blong oli mas glad olsem mifala.”

Prime Minista, Ismael Kalsakau i bin talem se hemi mensenem isu blong abscond long Australia Prime Minista se bae ol otoriti i wok blong inspektem ol farm.

Ol woka long meat factory ia hemi olgeta blong Vanuatu, Fiji, Japan mo Indonesia.