Gavman i saenem 13 oda anda long state blong emejensi we emi stat long wik ya. 

Minista blong Faenans mo semtaem Acting Minista blong Klaemet Jens mo Naturol Disasta, Hon John Salong, i mekem toksave ya igo long Nasonal Disasta Manejmen Ofis (NDMO) mo ol difren gavman ejensi. 

Hemi mekem anaonsmen ya afta we hed blong gavman, Praem Minista Charlot Salwai Tabimasmas, i deklerem state blong emejensi long ol 5 provins we Tropical Cyclone Lola i spolem. 

Fes 3 oda i go long NDMO mo sekuriti blong koantri. 

“Wan, Nasonal Disasta Manejmen Ofis mo Vanuatu Polis Fos (i) mas kontrol operesen blo disasta rispons rilif, lo evri level blo operesen mo mentenem civil-military kodinesen,” Hon Salong i talem.  

“Tu, Nasonal Disasta Manejmen Ofis i mas ensure se igat (continuous) komunikesen blo providem rekula apdet lo ol disasta rispons we i stap get carried out. 

“Tri, Nasonal Disasta Manejmen Ofis emi mas beginim (statem) rilif rispons (distributions) as per rispons prioritis mo mas ripot bak long disasta komiti lo ol jalenj, mo kodinetem ol ripsons blo tropikol saeklon Lola.”

Oda igo tu long Ministri blong Foren Afea mo Ministri blong Faenans folem olgeta sapot we bai i kam long ol okonaisesen ovasi. 

“Ministri blo Foren Affea i mas mekem sua se evri mani o eni sapot we i kam folem Tropikol Saeklon Lola disasta, we i kam long ovasi kaontri mo kavman, mo ol intanasonal okonaisesen tu, i mas go insaed long pablik fund akaon we i stap wetem Ministri blong Faenans mo Ekonomic Manejmen,” Hon Salong i talem.

“Sapot we i kam i mas lukluk long ol nid we Nasonal Disasta Manejmen Ofis bai i apruvum. 

“Dipatmen blo Foren Affea, Nasonal Disasta Manejmen Ofis, Dipatmen blong Immigration, Ministri blong Faenans mo Ekonomic Manejmen mo Dipatmen blong Customs i mas lukluk mo help long saed blong wajem ol non-food items, dry kakai, human risos, mani mo sapot long logistics.”

Hemi gohed mo talem tu se Ministri blong Helt i mas mekem sua se olgeta helt sevis i kasem ol afekted eria we TC Lola emi damejem. 

Oda igo tu long Telecomunication, Rediocomunication mo Brodkasting Regulator (TRBR) i mas meksua se olgeta komunikesen netwok i mas gobak long sevis. 

Dipatmen blong Eneji tu i mas meksua se koodination blong eneji o pawa i kobak long ol afekted komuniti. 

Oda ya i talem tu se dipatmen blong envaramen i mas mek sua se pipol ino killim ol pijin long state blong emejensi naoia. 

Hon Salong i odarem tu ol difren gavman dipatmen blong wok tugeta wetem Nasonal Disasta Manejmen Ofis naoia. 

“Gavman ejensi oli mas rilisim ol ofisa igo lo Nasonal Disasta Manejmen Ofis blo duration blo rispons ya. 

“Gavman ministri mo dipatmen oli mas re-prioritisem ol budget bo sapotem ol disasta rispons aktiviti blo eria blo risponsibilti mo ol cluster we i risponsibiliti blo olgeta,” Hon Salong i talem.