Oposisen i talem se oli gat 27 memba mo bae oli jenjem gavman long Fraedei.
Palemen i bin sidaon tede long moning blong fifth ekstrodineri sesen, be i no gat naf MPs blong gohed long siting ia from klosap evri kavman MPs i no bin stap.
Palemen bae i sidaon bakegen long Fraedei blong vot long wan mosen blong i nogat trast agensem Praem Minista Sato Kilman Livtunvanu.
Oposisen i klem se i gat namba blong remuvum Hon. Kilman olsem Praem Minista mo blong elektem wan niu praem minista.
Mo tu oposisen i talem se i gat 2 memba blong Vanu’aku Pati we i bin muv i go long oposisen saed. Mbe hemi no givim eni nem.
Long moning ia, long palemen Santo MP mo Minista blong Trade mo Commerce, Hon. Samsen Samson, hem i lego gavman mo i sidaon long oposisen saed.
Oposisen i talem bae i gat naf namba blong winim mosen ia long wan Palemen we i gat 51 memba nomo.
Hemia hem i from Suprim Kot long moning ia i bin faenem se sit blong Nasenel United Pati presiden, Bruno Leingkon, i vacant.
Hemi 4 wik nao we gavman blong Hon. Kilman i stap long pawa, afta we i bin remuvum Hon. Ishmael Kalsakau Ma’aukoro olsem praem minista long September 4.
Long mosen blong nogat trast ia, i gat 3 rison blong remuvum Hon. Kilman olsem praem minista.
Wan hemi se Praem Minista Kilman hem i bin appointem 13 minista taem we i gat 51 memba blong palemen nomo, we i minim se hem i mas appointem 12 minista nomo anda loa blong Vanuatu.
Mo tu mosen blong oposisen i talem se Praem Minista i bin mekem wan rabis desisen taem we hem i appointem Ambae MP Jay Ngwele olsem Minista blong Infrastructure mo Public Utilities.
Oposisen i talem se Praem Minista i bin mekem desisen ia nomata we i gat wan Commission of Inquiry ripot long alegesen blong corruption agensem Hon. Ngwele long aksen blong hem long mane blong Ambae rod, mo i gat wan polis investigesen yet long issue ia.
Mo wan nara rison blong mosen hem i se Praem Minista mo Foreign Minista Marc Ati i bin mestem impoten intanasenol miting we i includum Pacific Islands Forum mo United Nations General Assembly.
Lida blong oposisen Charlot Salwai Tabimasmas i talem se oposisen bae oli anaonsem kandidet blong olgeta blong niu praem minista long Fraede.
Mo oposisen i talem se bae niu praem minista i talem ol prioriti mo agenda blong niu gavman long fes toktok blong hem long palemen.
Mosen agensem MP Shadrack
Oposisen i bin putum 2 nara mosen long Palemen long fifth ekstrodineri sesen:
- Mosen blong remuvum Hon. Gracia Shadrack olsem fes deputi spika blong Palemen
- Mosen blong suspenem long Hon. Shadrack long Palemen
Deputi lida blong oposisen Hon. Ralph Regenvanu i talem se long siting blong Palemen long namba 16 Okis, Hon. Shadrack i bin sakem wan threatening toktok i go long Spika blong Palemen mo ol staff blong Palemen we hem i talem se bae hemi bonem haos ia.
“Hemi wan toktok we hemi wan thret blong pablik sefti, wan thret blong ol MP mo staff tu. Mo mifala bilif se kaen behaviour olsem o thred olsem hemi no acceptable long haos,” Hon. Regenvanu i talem.
