Prokram blong divelopmen blong futbol long vilij level i karem gudfala janis blong krowem sport long ol yang pikinini long Erakor.

Prokram blong divelopmen blong futbol long Erakor Vilij i krowem sport ia long vilij level, blong helpem ol pikinini we eij blong olgeta i stap long 12 kasem 17 yia. Las wik, VBTC Sports i visitim Erakor mo i toktok wetem wan long ol pleya we i stap aktiv long nasonal tim, Jacky Ruben, we hemi mein man bihaen long prokram ia.

Jacky Ruben i talem se “Evri Satete mifala i organisem prokram blong ol pikinini, we hemi long level blong klab blong Erakor. Mifala i invite ol narafala klab espeseli long south Efate blong join, mo evri eij grup, stat long 10, 12, 15, kasem 17, oli gat janis blong plei.”

Long las wik, prokram ia i bin lukim representetiv blong PVFA Pikinini Divelopmen Prokram tu i stap long taem blong ol matjes. Olgeta pikinini long difren katekori oli plei matj mo oli karem prais blong olgeta tim we oli win.

Prokram ia hemi no stap finis, be bae i gohed blong holem strong olgeta pikinini long vilij blong divelopem olgeta tru long sport blong futbol.