Tu billboard i stanap tete blong fo yia tabu long fes mo seken lagun blong Erakor, Efate folem hae amaon blong doti wota blong ol toilet.
Compliance Ofisa blong Water Risos, Peter Johnson i talem se faen blong VT100,000 i stap in ples sapos wan man i ko huk o swim long solwota ia stat tete.
Mr Johnson i talem se folem stadi blong mesarem solwota ia, hemi bitim standard blong World Health Organisation 10 taem.
“Ol doti we yumi faenem long lagun hemi wan bacteria we yumi faenem long sisit; Hemi stap long sisit blong man mo animol,”
“Any living samting we hemi save sisit bacteria hemi stap insaed long hem. Kwantiti blong hem ia nao insaed long lagun ia i bigwan we bigwan mo hemia nao yumi talem se yumi no mas kakae o swim long hem from bae ol man i save kasem sikras o red eye taem oli yusum solwota. Wan nara bacteria we yumi faenem aot hemi stap insaed long ol ded animol o man. Bigfala amaon blong pepet long ded animol mo ol sisit i bigwan long solwota ia i mekem se yumi mas putum tabu.
“Exempol sapos wan smol plastic blong 600mililita, yumi kasem wota long hem afta insaed long hem 100 bacteria i stap insaed long hem. Ale long Lagun blong yumi ia, wan plastic blong wota bae hemi araon 1000 bacteria mo taem yumi talem wan bigfala kwantiti blong wota olsem, hemi jes tumas. Sapos yu tinkbaot health blong yu fes mo seken lagun hemi no wan ples blong ko long hem long Erakor.”
Fes Lagun hemi stat long Erakor aelan resort i kasem long bridge. Seken Lagun i stat long Erakor bridge i kasem long Club Hippque.
Jif Wauote Patrick we i lukoatem Fisheries mo Environmen long Erakor i talem se ol pipol i mas rispektem tabu ia blong fuija.
Hemi talem se hemi wan jalenj from pipol i tekem kakae olsem fish mo shell long hem mbe solwota outsaed long lagun i open.
Long Decemba 2020 Dispensary blong Erakor long Efate i rikordem ova fo patient blong fish posen long wan dei sins October.
Nes injaj long Dispensari ia i talem long VBTC nius s I kat posibiliti se sik ia i hapen from ol amaon blong toti we i stap ko down long solwota blong erakor.
Mr Johnson i talem se oli mit tu taem wetem Vanuatu Tourism Ofis mo oli letem ol operata i save long tabu ia.
“Friday mifala i mekem wan nara miting wetem Tourism Ofis mo bae mifala i wok wetem olgeta blong traem manejem ol doti we i stap ko daon long solwota,” Mr Johnson i talem.
Tabu ia i stap kasem long 2026.
