Naoia bae ol pipol long Nod Wes Efate bae oli nomo travel longfala distens blong karem medikol tritmen afta weh oli openem fesfala Dispenseri blong olgeta,Ulei dispenseri .
Oli neva kat wan propa helt vaciliti kolosap long olgeta.
Long taem weh oli wantem karem medikol tritmen oli sikim help long Paunganisu Helt Centa,Lelepa Dispenseri , Mele o Maurifanga Helt Centa o Vila Central Hospital (VCH).
Wan lokol mama blong Tanoliu vilij , hemi talem seh long taem i kam,oli stap spendem big wan long transpot blong ko karem medikol tritmen beh naoia taem niufala dispenseri hemi open bae hemi help bigwan.
“Sam taem mifala nokat mani , beh mifala mas trae had blong ol pikinini blong mifala oli arem gud so mifala mas ko long bigfala Hospitol. Sam taem long naet mifala fesem had taem, mas faenem trak blong karem mifala ko long Hospitol.” mama ya i talem.
Dispenseri ya hemi kat 2 regista nurse weh oli statem wok long wik ya.
Midwaef, Mathew Robinson hemi pointem aot tu seh Nod West Efate hemi kat wan expensiv medikol system..
“Pipol long ples ya oli faenm i had tumas, from yumi kat Lelepa Dispenseri i stap, i stap long eria beh pipol i no saveh aksesem from u mas jam long bod bakeken blong ko kros. Spos oli referem yu ko long Vila, jam long bod o trak bakeken. Sam pipol oli faenem i isi blong kasem long Paunganisu, sam weh oli kat mani oli saveh ko, samtaem seves hemi difikalt.”
Deputi Nursing Maneja, Barry Saniel, hemi rimaendm ol pipol long Nod West Efate eria kaonsel seh befo oli ko long VCH oli mas karem wan referol form long Ulei Dispenseri fastaem befo oli kasem long VCH.
“Yumi mas mek use folem disentrolaise polici act weh i stap , mek use long dispenseri weh i stap, kam tekem medikol tritmen mo ol helt ofisa blong yumi nomo oli saveh referem yumi iko long bigfala mein Hospitol blong yumi.”
Ulei Dispenseri hemi stap long eria long Ulei Secondari Skul mo,Principal blong skul, Mackin Valia, hemi talem seh dispenseri ya hemi wan bigfala advantej long ol studen long skul.
“Dispenseri long wan wei bae hemi hel blong pusum olgeta blong blong wan dei olgeta tu oli saveh kam nurses, dokta, physicans o medikol ofisa.”
Opening blong Ulei dispenseri hemi bin tekem ples long las wik mo bae i statem seves long wik ya.
