Fes emejensi rispon i redi finis long Port Vila blong go long olgeta provins blong not we Tropikol Saeklon Lola i damejem. 

Tete Nasonal Disasta Manejmen Ofis (NDMO) mo ol patna blo hem, i stap loadem ol prioriti nid olsem shelta, hygiene kits, wota mo smol kakai igo long ship Tiwi Trader.

Kontrola blong nasonal emejensi operesen senta, Jimmy Naura, i talem se igat ol tim i bin go long olgeta aelan yestedei blong helpem provinsol tim.

Hemi talem se ol prioriti eria naoia hemi Penama provins, Malampa provins mo aelan blo Epi.

“Deployment emi stap daon lo ol eria kaonsel, lo ol komuniti. Mo sem taem tu oli stap mekem ol distributions blo ol immediate nid. Espeseli wota, shelta.

“Yumi gat lo Vila naia i gat few sip we ba oli stap aot tete, wetem ol non-food items blo oli save adresem those we oli stap lo immediate nid. 

“Neks tu o tri dei ba yumi gat moa details lo hamas yumi nidim blo rispon. 

“Ol Personal we i stap long graon oli statem rispons mo oli assist wetem rabid assesmen,” Mr Naura i talem. 

Mr Naura i talem se ofis inogat jans blo tekem wan full ripot yet long graon, folem damej blong saeklon. 

Oli no save kasem information long everi eria folem problem long access blong komunikasen blong Digicel mo Vodafone 

Be oli karem infomesen tru long netwok blong Starlink.

“Komunikasen i sta go on finis tru lo Starlink we i sta finis lo ol provins,” Mr Naura i talem.

“Hemia tu hemi wan plus we hemi help blong hemi komunikatem infomesen blo hemi save flo lo sam lo ol provins ya, blo yumi save spidimap rispons.”

Naoia NDMO i stap karemaot ol miting wetem ol rispons tim, folem nasonal emejensi rispons blong hem we bai i tekem ples long nekis wik.