Hemi festaem blong olgeta para tennis pleya blong Vanuatu blong ko patisipet long wan ovasi kompetisen long wik ia.
Patisipesen blong olgeta long kompetisen ia hemi kam tru long wan invitesen we i kam long wan para tennis lik blong Niu Caledonia.
VBTC Sports hemi storian wetem Teknikel Daerekta blong Vanuatu Tennis Federesen, Mr Yanni Honila mo hemi konfem se hemia hemi fes taem we tim para tennis pleya hemi ko patisipet long wan ovasi ivent olsem ia.
“Hemia hemi wan gudfala opotuniti blong openem doa blong yumi save ko sho kesem para tennis blong Vanuatu, mo some long olgeta se yumi tu yumi save mekem mo,” Mr Honila i talem.
Teknikel daerekta blong federesen we hemi semtaem kotj, hemi talem se oli luk fowod long olgeta kem blong olgeta we hemi kikoff finis long Mande wik ia kasem long wiken ia.
Kompetisen ia hemi wan mix ivent mo hemi komprais long wan katekeri nomo.
Wan long olgeta popular fes we hemi stap ranem olgeta tennis prokram long ol disability, Mr Tom Kalmet hemi wan pleya tu insait long tim Vanuatu para tennis.
“Wanem we mi wantem blong mifala i ko lanem long kompetisen ia, hemi blong karem ia kam samfla niufala aidia mo teknik long sport ia, from se olgeta pleya blong Niu Caledonia oli kat ol wil jea blong olgeta, so I gud blong ko lanem wan narafala aidia long wan difren envirinmen,” Mr Kalmet i talem.
Wan narafala pleya tu we hemi stap insaed long tim, Mr Freddy Muluan hemi hapi tumas blong save pat long smol team ia blong ripresentem kaontri blong hem long wan fes eva kompetisen olsem ia.
“Pepes blong pat long kompetisen ia, long mi hemi blong mi save kaem moa experiens long sait blong whil jea tennis, mo wetem wokabaut blong mifala long we bae helpem pikwan mifala olgeta para whil jea tenis,” Mr Muluan i talem.
Aot long tu mel pleya ia, i akt wan fimel we hemi tu i poenem tufala nem blong hem Jemilha we hemi yange long team mo hemi kat 22 yia, mo hemi talem se hemia bae hemi festaem blong hem blong travel.
“Hemi festaem blong mi, mi fraet blong flae long plen, be atleast mi save pat long team, so bae hemi interesting blong mifala i ko mo lanem moa niu teknik blong para tennis long Niu Caledonia,” Jemilah i talem long VBTC Sports.
Hemi adem tu se wanem we bae hemi ko lanem long wan wik kompetisen ia bae hemi save bildim ap karia blong hem log sport ia blong wan dei hemi save kam fiuja Vanuatu jampion, long sait blong para tennis.
Federesen hemi sendem 3 para tennis pleya ia i kat, Tom, Freddy mo Jemilah mo kotj Yanni wetem Ostrelian folentia we hemi beis wetem Vanuatu Paralimpik, Margeret Johnson.
Oli leko kaontri long sarere long wiken blong ko taon long Noumea. Kompetisen ia hemi stat finis long Mandei ia mo hemi sapos blong konklud long en blong wik ia.
Presiden blong Vanuatu Tennis Federesen, Cyrille Mainguy, i bin visitim tim Vanuatu long kem tedei.
