Angandoro Local String Band blong Saot Maewo bae i rilisim niu album blong hem long wik ia we insaed i kat wan family laef mesej song folem inkris namba blong unwanted pregnancy mo Sexual Transmitted Infection(STD’s) long Vanuatu tete.
Lynold Aru, wan memba blong band mo semtaem Yut ofisa long Vanuatu Family Health Association i talem long Vanuatu Laef sho long Radio Vanuatu se fulap relationship tete oli unhealthy.
Hemi talem se song ia i stap long trak 9 long niu album.
“Ol gel mo boy tete oli slip wetem olgeta we oli nosave se oli kat amas patna,” Mr Aru i talem.
“Yumi nogat good komunikesen skil long wan relationship we i sud kat.”
Mr Aru i talem se wan mama mo papa i mas komunikeit gud insaed long wan famili long saed blong lukaotem gud ol pikinini; Mo i no wok blong wan mama o papa nomo.
“So song ia i kam wetem mesej blong yumi mas mekem ol raet choice long fiuja.”
Angandoro Local string band i kat 13 song evri wan.
Mr Aru i talem se majoriti long ol song ia oli tokbaot ol seves blong kavman we i no kasem vilij blong olgeta, Mandiri vilij long saot Maewo we hemi wan rimot eria.
“So mifala ol yangfala i yusum song blong pasem aot ol mesej,” Mr Aru i talem.
Hemi talem se i kat tu love song nomo long album ia.
“Yu we yu neva save abaot Maewo yu tinkbaot nomo se hemi aelan blong Waterfall so kam mo harem ol niu mesej song ia,” Mr Aru i talem.
Band i askem pipol tu blong rispektem wok blong ol artist mo mas pem hadwok blong olgeta.
Lonj blong album ia bae i hapen long Port Vila, Maewo mo i kat sam lokol i salem ol procard olsem long Torba.
