EX-FOL Komuniti isolation long Port Vila bae i open long Wednesday.

Quarantine Inter-Agency Coordinator Community Isolation Center, Kali Amera i konfemem long National TV long Satete.

“EX-FOL yumi stap priperem naoia, mifala i bin luk blong openem long wik ia mbe sam logistik i mekem se bae yumi dilei,” Mr Amera i talem.

“Yumi hop se long nekis Wednesday ia bae yumi openem ap. Long plesia yumi wantem tekem ol pipol we oli sik moa bitim olgeta we i stap long Korman. I kat 121 bed. Wan saed bae oli haosem ol mama mo nara saed ol papa.

“Yumi kat ol fasiliti blong toilet mo putum extra shawa blong save sevesm ol sikman we oli stap insaed.

Long Korman yumi tekem olgeta we oli sik mo i nokat janis blong oli stap long haos. Fulap long yumi i liv long ol haos we plante pipol long hem blong oli save fil gud, yumi givim medikol klerens mo oli stap kobak long komuniti.

“Daon long Korman, yumi kat tu bilding; Korman wan hemi blong ol mama mo nambatu bilding hemi blong ol papa. So sins yumi open long las wik Wednesday, yumi bin kat fulap bed. I kat 120 bed mo oli bin fulap. Mo long wik ia taem ol man i stap aot afta long seven dei, yumi fulum ap sam mo bed.

“I kat ol Red Cross voluntia i stap longwe mo stap manejem mo tu i kat ol nurse we oli stap tritim ol man we oli sik.

Mr Amera i talem se oli enkarejem hom isolation tu espeseli long olgeta we oli kat sik vinis mo olgeta pipol wetem disability.

“Hemia i gud from i kat ol pipol we oli stap blong tekem kea taem man i sik,” Mr Amera i talem.

“I kat sam criteria we i stap long hom we ol pipol i save yusum.

Mr Amera i talem se oli stap wok wetem Shefa Provincial Kavman long steij ia blong faenem ol isolation senta long rural eria.

“So far ating Shefa i faenem tri ples vinis, Wan long Pango, Mele mo long Epule. Shefa Provincial kavman i stap wok wetem ol eria administrata blong pripea.

“Long Sanma, diskasen i stap ko blong faenem ol isolation senta. Mo ol nara provins tu yumi stap wok wetem olgeta.”

Mr Amera i enkarejem ol pipol blong tekem sam klos, sop, tootbrush mo smol sweets blong mekem laef i isi smol.

Hemi talem se ol famili oli save provaedem kakae wetem ol security long geit long Korman.

Long hom isolation long Shefa, i kat 688, 440 oli rilis . Long Hotel i kat 83, 173 oli bin rilis vinis i kobak long komuniti. Long komuniti isolation long Korman, naoia i kat ova 70 i stap insaed mo yumi bin rilisim araon 57 i kobak long haos.

Mr Amera i talem se hemi ol lates fika mo oli stap jens.

Long Sanma, yumi kat 55 we oli stap long home isolation, mo 24 oli bin aot vinis. Long hotel isolation eight i stap mo i nogat wan i rilis yet.