Erapsen blong volkeno long Ambrym hemi go daon tete moning be alet level blong hemia i stap long level 3 yet.
Long Sandei moning, Vanuatu Meteorology and Geo-Hazard Department (VMGD) i putemaot wan alet we i talem se alet level blong volkeno blong Ambrym hemi go antap kasem level 3.
Level 3 hemi minim se i gat minor o smolsmol erapsen.
VMGD i talem se i gat volkanic erapsen insaet long Benbow kreta long 10 oklok Satete naet. Hemi minim se i gat lava blong volkeno insaet long kreta ia mo volkeno i stap sakem bigfala klaod blong gas.
VBTC koresponsen long Malampa, Bong Massing, i givim apdeit long graon blong west Ambrym long Mandei moning se explosen hemi go daon.
I gat ol ases we volkeno i bin sakem long rof blong ol haus mo long tri taem we hemi bin faerap long 10 oklok Satete naet.
“Long this Mandei moning mifala no harem eni ting yet, evri tink hemi stap faea lo hem yet, ples i kwait yet,” Mr Massing i talem.
“Wanem nomo we stap hemi bin sakem aot sam ases weh hemi bin flae aot long taem ia ko lo sam ruf blong haos mo i foldaon tu long ol lif. Laet we hemi kamaot ia braetnes blong hem i nomo olsem we hemi bin kamaot long Satete naet, long Sandei naet braetnes blong laet we hemi stap long volkeno ia hemi ko daon.”
Be nomata long slo aktiviti naoia, ol pipol i advaes blong lukoat gud long olgeta mo no ko klosap long eria blong volkeno.
Ripot long VMGD i talem se denja eria i stap long 2km raon long Benbow mo 4km raon long Marum kreta.
“At the moment naoia bambae eni visita i no save ko, eni turis oli no save ko from naoia denja hemi stap araon long zon blong volkeno antap bae eni man i no sae ko,” Mr Massing i talem.
“And bae wanem nomo blong yumi ol komuniti araon long Ambrym yumi mekem plis naoia we stap yu rimovum spaot we konektem wota tank wetem hem ia konek long anda graon wel blong mekem se wota blong yumi hemi sef blong yumi save drink.
“From sapos we yumi no save rimovum bambae bigfala ren naoia bambae i karem evri ases ia bae kam insaet long wel o ol sef drinking wota blong yumi. But at the moment, we ren i no kam yet plis yumi rimovum blong mekem se yumi kat sef drinking wota i stap oltaem blong yumi save drink blong helpem yumi.”
Long team naoia, ol komuniti long solwota i bin lukim bigfala laet mo brightness olsem faea we i kamaot long moat blong volkeno long Satete naet.
Mo komuniti blong Bamal long west-kos, i bin muv aot mo finem sef ples long ol nara komuniti kolosap.
Hemia folem ol damej long Bamal we bigfala erapsen blong 2018 i bin kosem graon blong i brokbrok mo i stap kasem naoia.
Ol pipol blong Bamal bai oli kobak taem we VMGD i konfemem se strong aktiviti blong volkeno hemi godaon.
Long letes ripot long Sandei naet, VMGD i talem se janis se volkeno blong Ambrym i stap inrkis long level blong moderet irapsen (level 4) hemi lo.
