Ministry blong Education & Training i talem se English mo French hemi onli language long skul naoia.

Taem oli toktok wetem VBTC Nius, Ministry risponsibol long learning blong ol pikinini i talem se oli bin givim wan instraksen long ol skul principal wan wik bifo skul i stat long February 6 blong nomo yusum bislama language.

Prime Minista, Ismael Kalsakau anaonsem se bislama language long ol skul bae i stop.

Principal blong Amelvet Junior Secondary School long Not East Malekula, Seou Nimbwen i talem long VBTC Nius se hemi gud blong stopem from bae i helpem bigwan ol skul pikinini long saed blong reading.

“Wan wei blong kobak long english language hemi long stat blong skul hemi mekem pikinini hemi rij o save samting ariap taem hemi kasem Secondary; So yumi kobak long fes system blong yusum english language hemi moa help from oli pikim ap eli long Kindy mo klas 1,” Mr Nimbwen i talemaot.

“Taem yumi lanem bislama long ol pikinini long eli age, oli kasem long yia 7& 8, english sabjek i had wee long olgeta. So bae mifala stat blong tijim english long skul bakegen we hemi gud tumas.”

Wan parent we i no wantem talemaot nem blong hem i talem se hemi bislama i gud mbe i afektem ol reading taem oli muv i ko long hae klas.

“Smol gel blong me bae i ko long klas 3 long yia ia; mi arem gud tumas from naoia bae hemi nomo konfus bae hemi fokas blong learn long english nomo,” Parent ia i talem.

Wan parent long East Vanualava i talem se hemi hapi.

“Bifo taem mifala i bin skul long French skul, taem yu kam nomo long eria blong skul, yu toktok franis nomo kasem yu nomo blong ko spel long wan tu wik holdei; Tabu blong toktok long language blong yu o toktok bislama,” Mr Yemen i talem.

“So mi luk se hemi gud from i kat rul long skul blong helpem ol pikinini oli learn kwik. Mi sapotem tinktink blong kavman.”

Ministry blong Education mo Training i talem tu se ol tija i mas soem gud example blong toktok long french mo english oltaem long skul.