Enginir blong Korea we bai oli wok wetem Ifira Matnakara Housing Cooperative oli stap naia long kantri.
Oli stap long Vanuatu naia blong luk lo living standard blong ol memba blong Housing Cooperative ia, mo mekem plan blong bildim ol fes haos.
Afta long 1 manis taem agrimen hemi saenem between Ifira Matnakara Housing Cooperative wetem investa long Korea, tu enginir blong kampani ia oli kam long kantri long wik ia blong tokbaot mo long agrimen we tufala ikat.
Enginir Kim Jin Guk, Managing Direkta long JET Construction long Korea, i talem se Matnakara Cooperative wetem hem tufala stap blong wok mo sapotem ol wokbaot tugeta mo mekem wok hemi ariap.
Long agrimen blong tufala plan hemi stap blong fes shipment blong ol equipment hemi kam long manis February long nekis yia.
Kim Jin Guk i talem se kampani oli sendem plante equipments mo materials, mo seaport tax mo ol nara documents, mo Matnakara Cooperative help blong mekem proses hemi ariap.
Hemi talem se hemi understandem natural disasta saeklon we stap hitim Vanuatu, Matnakara Cooperative i wok blong helpem Vanuatu ikat strong aos.
2000 memba blong ifira Matnakara Housing Cooperative oli pem VT10,000 fee blong kam memba mo expectem blong housing cooperative ia hemi bildim strong haos blong olgeta we value blong hem hemi ova VT1 million.
Chairman blong Ifira Matnakara Housing Cooperative, Barak Sope, i talem se projek ia hemi kam anda long cooperative blong mekem ikam wan bisnis tu blong ol memba.
Mr Sope i talem se taem hemi bin praem minista long yia 2000 mo ol kantri ibin saenem wan agrimen long United Nation Summit blong by yia 2000 ol kantri oli mas impruv finis long haosing blong olgeta
Kasem year ia Gavman hemi wok klosap wetem cooperative ia blong mekem sua tingting ia hemi wokout.
“Ol haos ia hemi kam blong helpem ol man Vanuatu. Sam inokat inaf mani blong bildim ol strong haos we value blem i bigwan, so hemia nao program ia kam blong help,” hemi talem.
“Hemi part blong independence struggle blong yumi.
“Yumi nomas livim ol pipol iko poor.”
Korean kampani ia bai hemi wok wetem Ifira Matnakara Housing Cooperative blong bildim haos blong ol memba blong nekis 5 yia long aelan blong Efate.
Ifira Matnakara Housing Cooperative hemi openem baken registration iko kasem 3000 memba taem wan investor blong Australia hemi interest blong bildim nara 1000 haos blong ol memba.
Cooperatif ia i talem se wan eim blong hem i blong buildim ol sef shelta blong pipol folem ol strong saeklon we istap afektem Vanuatu.
