Vanuatu Weta Ofis i talem se i eli yet blong tropikol low bitwin Vanuatu mo New Caledonia bae i kam wan Saeklon.
Principal Scientific Ofisa Aviation Weta Seves long Meteo Dipatmen, Jerry Timothy, i talem se ol kondisen i no mitim yet blong kam wan Saeklon.
Mr Timothy i talem se system ia i stap kolosap long Niu Caledonia mbe ol cloud blong hem nao i mekem hevi ren mo win long Vanuatu.
“Hemi eli blong talem se long nekis tu o tri dei, tropikol low ia bae i kasem New Caledonia mo kambak,”Mr Timothy i talem.
“Jenis blong wan low presa olsem i dipen bigwan long ol apa level win mbe naoia system hemi stil stap semak. Hemi low yet blong kam wan saeklon mekem se yumi stil talem yet se hemi wan tropikol low.”
Mr Timothy i talem se low presa ia hemi bin stap long Saot Solomon Islands mo i muv i kam daon.
Wan lokol long Banban eria long Santo, i talem se ren ia i spoilem ol rod long eria ia, pepsi mo solwei.
VBTC Nius i kasem toksave tu se plante eria long kaontri solwota i raf mo flood.
