Monday, July 15, 2024
29.8 C
Port-Vila
Monday, July 15, 2024
More

    EAST PENTECOST HEMI MEKEM WAN WEK AP KOL I KO LONG OL POLITIKOL LIDA TRU LONG MUSIK MO ASKEM GUDFALA ROD

    Hemi longtaem i kam weh pipol i mas klaem hil blong faev haoa blong kasem seves blong rod mo helt.

    Jeaman blong East Pentecost Tamerin Local String Band long Vansarini vilij, Samson Bule i talem long VBTC Nius se kavman i fogetem gud east Pentecost.

    ”Taem ol mama oli wantem bonem bebe beh semtaem hemi had tumas mo mifala i mas mekem ol bed blong olgeta mo wokbaot wetem olgeta i ko kasem rod blong trak,” Mr Bule i talem.

    ”Title blong album ia ‘Wake ap kol’ i ko long kavman from evritaem oli kam campaign long ples blong mifala, mifala i rikwestem rod mbe nogat nomo. So naoia mifala i tekem stand blong pasem mesej tru long musik blong oli traem andastanem.

    ”Ship hemi pas wan wan taem, rod hemi nogud, ol fama bae oli salem kava olsem wanem blong sapotem famili.”

    Afta long Saeklon Lola long en blong Octoba, wan wan haos long Vanrasini i help blong sakem VT1000 long saveh givhan long ol man wetem ol yang boy blong oli ko karem ol bag rice mo tinfish long Melsisi, Central Pentecost.

    ”Mi wan weh mi ko wetem ol man long taem ia; mifala i wokbaot blong 5 haoa olsem kasem rod blong trak ale ko long trak blong karem ol kakae ia,” Mr Bule i talem.

    ”Mifala i wokbaot longwe tumas, long taem blong kambak ia, sam man mo boy oli sakem ol bag rice long bush from oli taet, ale long taem ples i delaet oli jes wokbaot bakegen from oli gat pawa blong ko karem.”

    Tamerin Local String Band hemi involvem ol yangfala man blong pat long mekem wake ap kol ia mo naoia oli stap long Port Vila wetem sale blong ol tiket long eli July ia.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen