Ova 200 household long sam eria long Port Vila wetem Mangaliliu long Efate i kasem sapot long shelter mo hygience kit, kitchen set, solar, mat, blanket mo mosquito net we Vanuatu Red Cross Society i stap givim aot.

Woman we i lidim Operation blong Vanuatu Red Cross Society blong disasta rispons, Jessica Binihi i konfemem wetem VBTC Nius se wok i ko hed yet.

“Mi nosave givim wan estimeit blong ol household we oli kasem ol item ia hemi estimeit hemi ova 200; I kat ol tim long operation senta we oli stap rikodem amas shelter kit olsem taraulen we yumi givim aot mo olgeta nao bae oli save talemaot stret mbe so far ova 200 household vinis we yumi kasem; So long Bladinia yumi statem wok long steij 1, 2 mo 3. Afta yumi tekem long Switi i ko kasem long 21 Jump long Tagabe. Yumi ko hed long wok kasem long Tagabe Anglican i ko kasem long Seven Star mo ko long Ohlen. Ohlen yumi stil kat bigfala wok yet blong wok long hem, yumi vinisim wok long Ohlen Mataso mo tete yumi stap long eria blong Ohlen Nambanga afta bae yumi save muv i ko long ol nara eria,” Ms Binihi i talem.

“Ol item we yumi givim aot i no ol kakae, yumi givim aot ol tapolen, hygience kit, kitchen set, sleeping mat, mo ol wota kontena; I depend sam haos i tekem 20 litre kontena mo sam 10 litre wetem ol solar laet.

“Wan grup blong ol 10 voluntia i statem ol distribution long Tuesday long Bladinia. Long Wednesday i kat fo grup, so wan grup i kohed long Bladinia, wan long eria blong Switi i ko kasem long 21 Jump, wan long Tagabe Anglican kasem long Seven Star mo las grup long ful eria blong Ohlen. Fes grup blong Bladinia i vinisim wok mo i kat 32 voluntia i ko long Mangaliliu long Thursday blong statem asesmen mo mekem distribution. Mo tete oli kobak mbe namba i ko daon long 20.

“So wan tim bae i ko long Eton i ko long Satete mo nara tim i tekem long Mangaliliu folem i ko long ol nara vilij mo offshore aelan blong Efate.”

Ms Binihi i talem se oli stap ko long wan haos mo mekem asesmen mo givim aot ol Non-Food Item folem principle blong Vanuatu Red Cross Society blong helpem laef blong pipol.

Vanuatu Red Cross Society i rikruitum 100 voluntia blong oli mekem wok ia.

“So oli ko raon wetem ol asesmen form blong rikodem amas item nao wan haos i nidim, plante mama, papa boy mo gel oli soem interest blong mekem wok ia,”Ms Binihi i talem.

“Hemia blong helpem ol nara wan we i stap long nid. Rikruitmen i open yet.”

Vanuatu Red Cross i stap helpem UNICEF tu wetem ol item ia.

Ms Binihi i talem se oli wok fastaem long Efate folem plan blong National Disaster Management Ofis.