Sam pipol we oli liv mo mekem gud ol haos bloks long West Tanauta i talem se bae oli mas muv aot long fuija folem disasta blong wota.
Charley Iawat i talem long VBTC Nius se haos we hemi stap yusum blong mekem bloks long hem i kam wan disasta zone taem i kat hevi ren.
“Long pleisa mifala i stap witnesem sam hevi ren afta long saeklon, we i luk wota i nomo folem ol rod blong hem, riva i blok afta i kamaot i ron i kam long yard blong mifala we i slip kolosap long saed blong wota, hemia i hapen bifo long fes saeklon we Judy mo afta Kevin tu we wota i kam antap hemi damejem sam haos blong mifala; Mifala i mas muv aot from naoia ol haos we mifala i stakem ol cement long hem oli stak evriwan. Haos we yumi stanap lem ia haos blong bloks mbe ren i mekem se cement i wetwet,” Mr Iauhat i talem.
“Bifo yufala(ol otoriti) i kam mekem rod plis kam luk mifala we i liv long ol plesia longtaem blong givim infomesen abaot wota. Long smol team we saeklon i kam ia oli sud kam muv sam ples we wota bae flo gud long hem mbe naoia we ren i ren ale oli wantem kam wok we wota i spoilem mifala vinis. So hemi disasta zone vinis bae hemi no sef blong liv long plesia, mifala i spendem mani mbe pa mifala i nogat choice mbe mas muv aot long fiuja.
“Bigfala hevi ren nomo i damejem haos, i tekem aot kolta i mekem se long sam ples wota i fulap long ol haos mo olgeta long Public Works i tekem ol JCB masin ia i kam blong blokem rod blong wota i no fulap long ol haos.
“Ol Chinese ia i sud kam luk mifaka blong askem hao nao wota i ron from bifo wota i ron gud nomo mbe naoia oli mekem wan drainage ia i mekem se i fas afta i mekem wota .
Acting Manager long Tafea Public Works Dipatmen, Rodger Komie i talem se bae oli mekem kwik respons taem flood i ko daon.
“Yumi we liv saed wota blong faenem blong faenem wan sef ples, Public Works bae i nosave fixim drainage mo rod taem rabis weta blong ren; Yumi wet taem ren i ko daon bae yumi save wok,” Mr Komie i talem.
Hevi ren long wik i mekem plante eria long West, Middlebush mo Central Tanauta i kasem flood afta long Tropical Saeklon Judy mo Kevin.
