Ministri blong helt i rikodem wan dikris long sik blong eye we oli kolem trachoma.
Neglecting Tropical Disis Vocal point long Ministry blong Health, Vasiti Taleo, i talem se trachoma hem i bin wan top eye disis long kaontri long 2015.
Mrs Taleo i talem se mbe disis ia i bin drop bigwan afta we helt i bin putumaot 100 tim blong ol ofisa blong hem we oli bin ko aot mo tritim ol man from sik ia long 2016 truaot long kaontri.
“Long 2017 mifala i mekem wan moa survey blong trachoma mo faenem se sik ia i stap ko daon,” Mrs Taleo i talem.
“Mo long 2019, mifala i submitim wan faenol ripot i ko long World Health Organisation blong talem se Vanuatu i fri long sik blong Trachoma.”
Mrs Taleo i talem se naoia oli stap wet nomo long respon blong World Health Organisation blong certifaem se Vanuatu hemi fri long trachoma.
Dokta blong eye long Vanuatu, Johnson Kaso, i talem se sik ia hemi pas tru long ol flae.
Hem i eksplenem se taem flae i sidaon long eye blong wan man mo pasem germ i ko long eye ten germ ia i kosem red eye.
Hemi talem se sapos man ia i no kasem tritmen kwiktaem bae i save mekem hem i blaen.
Dr Kaso i talem se long wan stadi we oli bin karemaot, risal i some se araon ten pesen blong population blong Vanuatu oli kasem sik ia, ol big man mo smol pikinini.
Sik trachoma hemi wan infectious disis we i stap hapen long population blong Vanuatu mo hemi cos taem ol pipol oli stap long wan ples we i crowded tumas, oli kat shotej blong wota, pua haejin mo oli nokat gudfala toilet.
Dr Kaso i talem se wan narafala sik blong eye hemi trauma.
Hemi talem se hem ia i afektem bigwan ol pikinini we oli stap pleple wetem ol sharp objek olsem smol knife.
“Mi apil long ol papa mo mama blong oli no mas kivim ol sharp objek long ol pikinini blong olketa blong oli pleple long hem from bae oli save kosem kil long eye blong olketa,” Dr Kaso i talem.
“Mi plis long ol perens blong mas lukaotem gud ol pikinini blong olketa.”
“Wan narafala isiu blong eye hemi taem i kat raorao wetem wan man mo woman, ol woman oli stap kam victim blong domestic vaelens mo i no physikol nomo mbe i afektem eye blong olketa mo fulap oli lusum saet.”
Dr Kaso i askem ol patna blong no spoilem eye blong ol fren blong olketa.
Eye Clinic long Vila Central Hospital i kasem vinis sapot blong Kavman blong Vanuatu mo Dr Kaso i kongratulatem kavman tru long Ministry blong Health.
“Onli samting we i distebem wok blong yumi hemi COVID-19 pandemic we i holem taet budget blong yumi,” hemi talem.
“Komitmen ia we kavman i mekem hemi blong kavman i mas tekem onasip long program ia from mifala i no wantem tumas blong dipen long Fred Hollows we hemi wan gudfala patna mbe yumi wantem wan samting we hemi blong yumi.”
Dr Kaso i talem se rilis blong ol eye nurse long ol provincial hospital long kaontri i soem sapot blong Kavman.
“Ol eye nurse we oli kam long trening long manis ia bae oli kobak wetem ol niufala save blong save dilivarem long ol lokol long komuniti,” hemi talem.
Dr Kaso we hemi onli eye dokta long kaontri i mekem apil long population blong Vanuatu blong tekem ol advaes blong ministry blong helt i serious mo lukaotem gud helt blong olketa.
