Diskasen i stap tekem ples blong faenem ol COVID isolation senta long Not Efate.

Shefa Public Health Manager, Obed Manwo i talem se i kat tu ples; wan long Manua Primary Skul mo nara wan hemi Epule Technical Training Senta.

“Hemi ol ples we yumi faenem mo bae i yus olsem ol Community Isolation Quarantine blong yumi,” Mr Manwo i talem.

Mr Manwo i talem se ples ia nao taem ol pipol long Not Efate mo ofshoa aelan i sik oli save stap long hem.

“Long Saupia Health Senta yumi givim aot tu health test blong COVID,” Mr Manwo i talem.

“Sapos yumi long Not Efate mo Ofshoa aelan i stap experiencem saen blong COVID, kam nomo long Saupia Health senta. Bae i kat ol tim i stap blong testem ol pipol we oli kat flu.

Diskasen i stap hapen wetem Secretary General blong Shefa, ol patna blong Health Ministry, Polis mo ol eria administrata.

Mr Manwo i talem se ova 10 pipol i muv i ko vinis long Korman isolation mo namba i inkris evri dei.

Hemi talem se olgeta we oli kat gud hom, oli save stap long haos mo letem surveilens tim i visitim olgeta kasem seven dei.

“Long EX-FOL preperesen Nursing skul long Vila Central Hospital, ” Mr Manwo i talemaot.

Mr Manwo i talem se Vila Central Hospital i putum aot ol outpatient seves blong hem i ko long ol klinic long Efate.

Hemi talem se kavman i rikruitum ol niu mo retired nes oli ko wok long hem.

Mr Manwo i talem se olgeta long Port Vila oli save tekem COVID tes long Vila Central Hospital nomo blong no distebem ol nomol health seves long ol nara clinic.

Shefa Health i talem se vaccination long Convention senta i on. Mo i kat ol mobile tim we oli pas long ol ministry mo franlaen agensi long wik ia blong givim stik.

Imere Health mo Pango Health senta tu pipol i save kasem COVID stik long hem. I kat ol private health clinic olsem Novomedical, Promedical, Vanuatu Private Clinic mo medical senta we oli jajem fi blong tekem stik mo COVID tes.

Ova 57,000 taget populasen blong tekem stik long Shefa, ova 80 percent i tekem stik. Boosta stik hemi 9 percent. Long Port Vila, rijim wan kaverej blong 82 percent mo bosta dos hemi 11 percent.