Ministry blong Health i ripotem Dengue feva outbreak long eli February ia.
Long January 4 ia, Vila Central Hospital i rikodem tu konfem kes blong dengue feva. Ministry blong health i ripotem se tufala kes ia i nokat histri blong travel i ko ovasi mo hemi minim se tufala i kasem sik ia long Vanuatu nomo.
Ministry blong i health i rikodem tufala kes ia long Erakor mo Salili eria.
Long health tokbak sho long tete(Friday), Wendy William, Seveliens Maneja long Ministry blong Health, i talem se ol komuniti i mas tekem risponsibiliti blong ko tekem health tritmen taem oli sik espeseli afta long wan disasta blong flood.
Mrs William i enkarejem ol pipol blong oltaem lisen long ol health advaes. Hemi talem se i kat ol provinsil health ofisa long ol aelan mo hemi gud blong ko askem advaes sapos oli nidim help mbe no sherem ol kiaman infomesen.
Mosqito we i pasem sik ia oli kolem Aedes mo kala blong mosqito ia kat black mo waet strap. Semak mosqito ia i pasem zika vaeras, chikungunya mo yello fiva sik.
Ol saen blong dengue feva hemi traot, ol bodi, hed mo behaed long ae i soa mo i kat rash long bodi.
Ministry blong Health i mekem wan kol long evri jej, skul mo komuniti lidas blong mobolaesem ol grup blong olketa mo klinim ples raon long haos, komuniti mo pablik eria blong help priventem mo katem daon transmison blong sik ia long Port Vila mo Efate.
Ripot i talem se National Vector-borne Disis Control Program mo Public Health Seves i stap monitarem sik blong priventem dengi mosquito mo spred blong virus ia.
