Ministri blong Climate Change hemi gat wan niufala Director General, David Gibson afta weh Public Service Commission (PSC) Chairman, Martin Mahe hemi givim leta blong apoenmen blong hem tete morning. Disisen blong PSC blong mekem apoenmen ya i tekem ples long las wik long commission meeting.
Long saed blong academic qualification Mr David hemi graduate wetem wan masters Degree long Bisnis Administration, wan bachelor blong Science Degree, mo Diploma long meteorology. Hemi bin serve long taem olsem Director blong Vanuatu Meteorology mo Geo-Hazard Department.
PSC Chairman Martin Mahe i highlightem ol impoten wok we niufala DG i mas mekem:
✅ Reviewem structure blong ol dipatmen blong mekem wok i go moa gud
✅ Setemap niufala Geo-Hazards Department
✅ Stretem mo strengthenem Department blong Environment
✅ Enforcem ol envaironmen loa, speseli long ol taon eria
Wan bigfala jalenj we PSC i luk long Ministry hemi se plante staff oli resign blong go wok long ol project. Mahe i talem se, “Hem i jalenj blong yu blong reviewem ol structure blong ol dipatmen blong mekem se yumi save attractem ol suitable candidate blong oli kam mo strengthenem wok blong yumi long envaironmen.”
Mo tu, Ministry bai wok klosap wetem Municipal mo Ministry blong Internal Affairs blong mekem sua se ol indastri oli folem ol loa blong envaironmen.
PSC i biliv se anda long leadership blong Gibson, Ministry bai save wok strong blong stretem mo protectem climate mo envaironmen blong Vanuatu.
