Kavman i anaonsem wan bigfala kat daon blong ristriksen long en blong curfew i ko long level 2, repatriation flaet mo ol skul i on long Shefa.
Be Minista blong Health, Bruno Leingkone i anaonsem wan outbrek blong virus long Torba mo long Pentecost. Hemia nao i mekem se kavman i putum Torba mo Pentecost long alert 3.
Kat daon blong ol ristriksen i fomem pat blong wan rodmap we Health Ministry i rilisim tete we i muvum kaontri long wanem kavman i singaotem se niu nomol taem hemi stap pripea blong openem International boda long July 1st long yia ia.
“Bambae yumi leftemap curfew long Efate mo offshoa aelan; Ol skul bambae oli open be wetem ol ristriksen mesa, olsem fisikol distens, hand wash station mo werem mask; ol non esensol seves oli save operate be oli mas gat COVID plan o proses blong wok wetem. Ol hospital seves oli save opereit be oli i mas kat COVID plan tu, ol domestik travel oli alao be oli mas folem gud ol travel kaedlaen we Ministri blong Health i putum aot,” Minista Leingkone i anaonsem.
“Repatriation flaet hemi stat, be hemi alaoem nomo ol sitisen, residen, mo olgeta we oli stap anda long spesel kategori visa, inkludum ol seasonal wokman we oli pat long Seasonal Workers Program mo Recognised Seasonal Employer.”
Minista Leingkone i askem pipol blong kontinu blong washem hand wetem sop mo wota o yusum hand sanitaesa.
“Social gathering hemi alao bageken be wetem ol strik protocol olsem social distens, werem mask mo washem han oltaem,” Minista Leingkone i talem.
“Ol pablik transpot oli save inkrisim pasenja i ko long 6 mo 7 sapos hemi ol box bus. Meintenem ol health mesa oltaem.
Semak taem, Minista Leingkone i givim aot COVID apdeit long kaontri.
“Hemi sad tu blong mi anaonsem 5 moa ded we hemi link long COVID mo serem sori long kavman wetem ol famili,” Minista Leingkone i talem.
“Ol faev ded ia, i gat 2 long Shefa mo 3 long Sanma Provins mo ol ded ia 3 man mo 2 woman.
Ol faevfala ded ia i bin hapen sam dei i pas be Ministry blong Health i jes konfemem folem investikesen mo asesmen ripot se ol ded oli link long COVID.
Vanuatu i rikodem 12 ded evriwan we oli rileit long COVID sins komuniti outbreak.
Sanma, Torba mo Pentecost i stap long alert level 3.
