Pacific Encounter cruise ship bae i feswan blong kambak long Vanuatu long eli Novemba.

Pacific Encounter i schedule blong leko Brisbane(Australia) blong kasem Port Vila long Novemba 9. Tete National Cruise Tourism Management Committee i mekem anaonsemen ia.

Mo Pacific Adventure bae i sail long Sydney kasem Mystery aelan long Novemba 18, Mo bae i kasem Port Vila mo Luganville.

“Ol turis oli laikem Vanuatu wetem ol pipol mo oli luk fowod long dei we bae oli kambak long wan kaontri we i mekem Saot Pacific wan atrativ region blong curise tourism,” Presiden blong Carnival Australia mo P&O Cruises Australia, Marguerite Fitzgerald i talem.
“Mifala i talem tankiu long kavman blong Vanuatu blong putum trast P&O Cruises Australia blong help faenem wan wei blong tekem bak ol cruise ship i kambak long Vanuatu.”

Caretaker Minista blong Tourism, James Bule i talem se oli hapi tumas from bae i givim vatu long pipol.

“Mifala i glad tumas blong luk fes international cruise ship i kambak long shoa blong yumi from hemi ripresentem fulap komuniti mo domestik tourism bisnis sekta i dipen bigwan long saplae chain ia,” Mr Bule i talemaot.

“Ol taxi, bus, ol tour operata, transfer kampani, handicraft, ol stao we oli salem ol Vanuatu Made product mo plante moa we oli tekem vatu long cruise maket. Mo taem ol cruise ship ia oli kambak bae oli help bigwan blong putum mani i kobak long poket blong ol pipol ia.”

Kavman i welkamem fes trial long Novemba 9 kasem Decemba 1 2022 taem oli stat kambak olsem festaem bifo COVID.

Acting Director long Tourism Dipatmen mo jea blong National Cruise Tourism Management Committee, Geraldine Tari, i talem se oli bin kat plante toktok wetem Carnival Cruises mo Royal Caribbean Cruise Lines sins July blong agri long wan rikava plan blong maritime sefti.

“Hemi no wan isi rod be yumi nid blong stat samples mo bae i help long tourism mo hospitaliti sekta,” Hemi talemaot.