Ministry blong Health i konfemem 10 niu COVID-19 komuniti kes sins Saturday.
Minista blong Health, Honoroble Bruno Leingkone i anaonsem long tete evening.
Minista Leingkone i talem se ol kes ia hemi blong olgeta we oli bin stap long kwarentin vinis mo olgeta we oli pat long kondak tracing.
“Risal blong kontakt tresing hemi soem se positiv patient ia hemi bin kat kontak wetem 120 pipol,” Minista Leingkone i talem.
“Kasem tete 48 long olgeta oli bin muvum olgeta finis i ko long kwarantin fasiliti. Ol narafala wan Ministry blong Health i stap kohed blong tresem olgeta mo muvum olgeta i ko long kwarantin fasiliti.
“Long situasen ripot blong Ministri blong Helt long tete hemi soem se yumi kat, 10 niu keis blong COVID-19 long komuniti we oli rikodem sins last satete, 0 rikava kes, 7 aktiv komuniti kes we oli rikodem long last 24 haoa – Mo 0 (zero) admisisen i ko long hospitol, Wetem hemia, naoia Efate mo ol Offshore Aelan oli muv i ko long alet level 3 we hemi minim se risk hemi hae tumas mo i gat komuniti transmisen blong COVID-19.
“Kasem tete yumi rikodem 58 kes blong COVID-19 evriwan long Vanuatu. Hemia hemi inkludim komuniti transmisen wetem boda kwarantin keis sins long taem we Vanuatu hemi stap long alet level 1 long February. Kavman tu i stap wok blong inkrisim namba blong ol kwarantin fasiliti blong mekem sua se yumi kwarantinim pipol we oli ol kontakt mo pipol we oli positiv.”
Minista Leingkone i apil blong pipol i rispektem ol protokol blong Kavman we i putum olsem ol taem blong curfew, ol man oli no sud wokbaot mo esensel seves i kohed afta long ol taem ia.
“Olgeta we oli no kasem COVID-19 vaksin inkludum bosta dos yet oli mas go fowod blong kasem vaksin long vaksinesen senta,” Minista Leingkone i talem.
“Hemi impoten tumas se olgeta we oli olfala (55 yia i ko antap) wetem olgeta we oli gat sik long bodi blong olgeta, oli mas kasem vaksin. Vaksin ia nao bae hemi sevem laef, blong mekem se yu no sik bigwan, silip long hospitol mo lusum laef. Hemia nao ol meja taem yumi stap long alet level 3.
Evri non -esensel seves hemi klos – Ol skul oli klos – Ol non – esensel kavman seves hemi klos – i nogat ol pablik kataring oslem jios seves, maret, ded. – Curfew, ol man i no save wokabaot stat long 6pm kasem 6am, mbe ol esensel sevis nomo wetem olgeta we oli nidim helt emejensi sevis oli save muv araon aotsaed long ol haoa ia; – I gat ristriksen blong muvmen blong pipol i ko long ol esensel sevises eria mo i alaoem faev (5) pipol nomo i save aksesem sevis long wan taemOl pablik transpot olsem ol bas oli alao nomo blong karem faev (5) pasenja (inkludem ol pikinini) mo oli mas gat insaed long bas ol han sanitaesa mo mask, – Ol taxi oli alao nomo blong tekem tu (2) pasenja (inkludem ol pikinini) mo oli mas provaedem han sanitaesa mo mask. – Fisikal distensing o stap 1.5 mita longwe long narafala man.
Stat naoia i ko werem mask oltaem sipos yu ko aot long haos blong yu o stap long ol ples we i gat tumas man long hem; –
Minista Leingkone i talem se ol inbound domestik medivac mo ol intanasonal outbound medivac oli save ko hed.
“Folem disisin blong Pablik Helt Imejensi Operesen Senta, 72 haoa lokdaon wei i stat lo Saturday March 5 2022, bambae hemi finis long tumoro morning, Tuesday namba March 8th 2022 long 6am. Mo bambae Ministri blong Helt bae I kamaot wetem moa apdeit,” Minista Leingkone i talemaot.
Mi wantem apil tu i ko long pablik blong no muv olbaot, from taem yu muv, vaeres hemi muv wetem yu. Sipos yu lukim ol symptom oslem, trot, bodi i soa, kof, no pulum gud win, ko kwiktaem long Vila Central Hospital, helt senta we i kolosap long yu o praevet dokta blong kat wan tes mo jek ap.
“Mi wantem remaedem yumi baeken se Yu mas karem stret infomesen long ol ofisal sos we hemi Ministri blong Helt. No spredem ol infomesen we yu save se hemi no tru. Blong kasem moa infomesen mo apdeit plis go long Ministri blong Helt COVID-19 websaet, folem Helt Promotions FaceBook Page o kolem 119. Tankyu tumas. God i blesem yumi evriwan.”
