Council blong ol Minista bae i sitaon long Sunday blong disaed long niu direksen folem en blong 14 dei curfew.
Minista blong Health, Bruno Leingkone i talemaot long National TV tete(Satete) moning.
“Long 12 o’klok midel naet bae 14 dei curfew hemi en,” Minista Leingkone i talem.
“Bambae Council blong ol Minista i sitaon bakeken long tumoro blong helpem mi olsem Minista blong Health blong givim wan niu direksen folem situasen we yumi stap ko tru long hem tete.”
Minista Leingkone hemi remindem pipol se protocol blong COVID hemi stap yet anda long Level 3 situasen long kaontri.
Hemi talem tu se pipol i no alow yet blong travel in mo aot long Efate aelan.
“Mi remindem yumi ol pipol blong nara provins se kavman hemi no alaoem yet muvmen blong ol pipol espeseli long Port Vila mo ol ofshoa aelan blong Shefa Provins,” Minista Leingkone i talem.
“Ol pipol blong Luganville, Sanma provins blong no mas ko long nara provins. Olsem we mi bin talem se onli pipol we oli alao blong aot long Port Vila hemi ol pilot blong plen we oli stap mekem ol flaet blong cargo nomo. Ol nara wan hemi ol captain mo crew blong ship we oli stap karem cargo i ko long ol aelan.
Health hemi rikodem 263 kes long last 24 hour, 243 long Efate mo 20 long Shefa provins.
Noaia i kat wan total blong 1,408 case we oli aktive mo 555 oli rikava. I nogat ded long virus ia.
