Ova 100 coconut crab blong Torres aelan i sale long Tamahu Natai Fish Market long Port Vila long June ia.
Cooperative Business Development Ofisa long Torres Eria Council, Eddy Woksen i talem se ol pipol long fo aelan blong Torres oli hapi wetem ol smol vatu we oli risivim afta long fes load blong coconut crab we oli bin sendem long June ia long Port Vila.
“Torres eria council yumi traem blong faenem ol maket blong hem; hao oli save maketem ol coconut crab blong olgeta, mo oli bin yusum cooperative nao blong faenem maket,” Mr Woksen i talem.
“Yumi faenem maket tru long netwok blong Vanuatu Cooperative Business. Nomoli yumi sud yusum ol cooperative we oli memba nomo be from diman hemi hae.”
Moody Vusilai long Tamahu Natai Fish Market, i talem se tete problem long maket long kaontri i mekem i had blong pipol i faenem vatu.
“Vanuatu Cooperative Business Network i kam insaed blong help blong ol lokol i save giv i kobak long ol komuniti.”
Arenjmen ia hemi blong Torres Eria Council bai i stap olsem mein saplae blong coconut crab i kam long Port Vila.
Long 2018 Fisheries Dipatmen i bin mekem wan asesmen long populesen blong coconut crab long Torba. Asesmen ia i soem se populesen blong ol kokonat crab we oli gud blong pipol i save havestem hem i smol kompea long yang populesen.
From risen ia Fisheries i kivimaot wan oda long August 2020 blong banem Torba Provins blong no havest blong kakae mo salem stat long August 2020.
Kavman i tekem aot tabu blong coconut crab long Torba Provins long en blong January.
Minista blong Fisheries, Honoroble Willie Kalo Daniel i saenem oda blong karemaot tabu ia mo kivim raet blong havestem coconut crab.
Deputy Director blong Fisheries Dipatmen, Tony Taleo, i talem se tabu ia i aot from coconut crab hemi mein sos blong mani blong ol pipol long Torba.
Pipol i save faen VT200,000 sapos oli salem o kakae coconut crab blong Torba Provins.
Eria Administrata blong Torres, Thomas Putunleta i bin talem se mani blong coconut crab i bitim copra.
Hemi talem se wan eski blong coconut crab hemi ova VT20,000.
Tamahu Natai Fish market long Port Vila i fulap wetem ova long hundred coconut crab we i kam bakegen long flaet blong Monday we i pas.
