Chinese Ambassador long Vanuatu, Li Minggang, i bin mitim Praem Minista blong Vanuatu, Charlot Salwai, long wik ia mo i talem se China hemi sore blong lukim ol man we oli bin afekted long Tropikol Saeklon Lola.
Ambassador Li i toktok mo talem se China i laek blong helpem Vanuatu long ol samting we i save helpem living blong pipol i kambak nomol bagegen.
Hemi se China bae i givim VT23 million blong helpem gavman.
Long 2018 Hon Salwai mo President Xi Jinping blong China ibin mit mo taem ia, China mo Vanuatu i mekem partnaship blong tufala kauntri i ikam strong moa.
Long past 5 yia, China-Vanuatu i wok long wan fasin we i luksave respek, solidareti mo koordinesen bitwin olgeta kauntri.
Long sos long informesen blong mifala, Chinese Embassy long Vanuatu i karem VT23 million worth blong ol samting we oli save helpem ol man we oli stap long not blong Vanuatu we TC Lola i kilim olgeta moa.
Ol samting bai inkludem iron ruf, raes, sola pawa lamp mo ol narafala samting.
Afta long TC Judy mo Kevin long manis March 2023, China i kam blong givim 600 thousand US dollars o ova VT73 million iko long gavman blong Vanuatu mo oli sendem samting we valiu blong hem i kasem VT200 million ikam long ship mo plen.
